• Эхлэл
  • Г.Хайдавын шавь нар чуулна

Г.Хайдавын шавь нар чуулна

2017/09/19

Монгол Улсын Хөдөлмөрийн баатар, Ардын жүжигчин, СУИС-ийн хүндэт доктор, профессор, Монголын дуурийн урлагийн дэг сургалтыг үндэслэгч Гонгорын Хайдавын 90 насны ой тохиож байна. Монголын шинэ үеийн урлагийн сор болсон олон сайхан бүтээлийг нь монголчууд андахгүй мэднэ. 

Дундговь аймгийн Дэлгэрхангай сумын харьяат тэрээр Москва хотноо П.И Чайковскийн нэрэмжит хөгжмийн дээд сургуульд 1948-1954 онд суралцан төгссөн нь манай дуурийн дуучдын хамгийн анхны дээд боловсролтой мэргэжлийн дуучин юм.  Уг нь түүнийг Москвагийн хэвлэлийн сургуульд суралцуулахаар явуулсан ч авъяас сонирхлоороо урлагийн сургууль руу хальтирсан гэдэг. 

1942 онд уран бүтээлчдийн дунд зарласан зохиолын дууны анхны уралдаанд С.Гончигсумлаа, Б.Бааст нарын "Чамайг үдье" дууг дуулж тэргүүн байр эзэлж байсан нь алдарт дуучны маань их урлагийн гараа байсан биз ээ.

Олон сайхан дуу, ари, романс дуулахаас гадна өөрийн орны хөгжмийн зохиолчдын болон дэлхийн сонгодог 20 орчим дуурийн гол дүрийг гайхалтай сайхан бүтээсэн энэ эрхэм манай сонгодог урлагийн хөгжилд оруулсан том хувь нэмэр бол эх орондоо дуурийн дуучдыг бэлтгэх сургуулийн үндэс суурийг тавьсан явдал юм.

Анхны шавь нараас нь Төрийн шагналт, Ардын жүжигчин, Зууны манлай дуурийн дуучин Х. Уртнасан, Гавьяат багш Ц.Ерөө, Ардын жүжигчин Д.Баадайжав гээд олон алдартнууд, өнөө цагийн сайхан дуучид УГЖ Х. Үнэнхүү, УГЖ У. Далантай, УГЖ С. Жавхлан зэрэг олон шавийг  нэрлэж болно. 

Мөн Хөгжмийн зохиолч, хуурч, хормейстер Х.Сэргэлэн, МУГЖ дуучин Х.Төмөрбаатар, хөгжим судлаач Х.Ариунаа,  найруулагч, хөгжимчин ач зээ нар нь үе удмаараа Монголын хөгжмийн урлагт авъяас билгээ зориулж явна. Эдгээр шавь нь нар багшдаа зориулж тоглолт хийхээр болсон байна. 

Есдүгээр сарын 21-ний үдэш УДБЭТ-т хүндэтгэлийн тоглолт болох энэ үеэр бөгөөд 90 насных нь ойд нь гарч буй ном болон баримтат кинотой нь танилцаж болох юм байна.

Ойн арга хэмжээний хүрээнд ,

2017.09.21-нд  Соёл урлагийн их сургуулийн “Оюутан” театрт
10:00  “Монголын дуурийн дуулаачийн зуун дамнасан дэг сургууль” Эрдэм шинжилгээний хурал
11:00  “Дамжуулах үг” Баримтат киноны нээлт

Дуурь бүжгийн эрдмийн театрт

16:00  “Г.Хайдав 90” Фото зургийн үзэсгэлэн,
17:00  “Монголын дуурийн хан хүү” Хүндэтгэлийн тоглолт, Номын баяр болно.


ИХ УНШСАН

Сэтгэгдэл байхгүй байна

Сонин хачин