-Сайд Ц.Даваасүрэн эрчим хүчний салбараа хөгжүүлэх гээд байна уу, хорлох гээд байна уу???-

Сүүлийн хэдхэн хоногт хоёр бяцхан хүүхэд цахилгаатай утаснаас болж амиа алдсан ч Эрчим хүчний салбарынхан таг чиг. Хэдийгээр олон нийтийн сүлжээгээр хоёр хүүхэд амиа алдсан явдалд Эрчим хүчний сайд Ц.Даваасүрэн хариуцлага хүлээх ёстой гэсэн давлагаа хүчтэй өрнөсөн ч эрхэм сайд “а” дуугарсангүй, ядахдаа эмгэнэл ч илэрхийлсэнгүй.

Тог цахилгаатай утас ийн хаа хамаагүй хэвтэж, хүний амь залгиж байгаа замбараагүй байдал өнөөдөр эрчим хүчний салбарын эмгэгтэй байдлын шууд илэрхийлэл гэхэд хилсдэхгүй. Өнөөдөр улсын төсөвт маш том байр эзэлдэг шигээ, улсын төсвөөс чамгүй хороог нь эрчим хүчний салбар. Гэвч энэ салбарынхантай хариуцлага тооцох эзэн алга.

Арав гаруй жил яригдаж байгаа ТЭЦ-5, Багануурын цахилгаан станцын ажил ямар ч ахиц гарсангүй.  Өмнөх 2012-2016 оны Засгийн газруудын үед бас ч гэж нэлээн ахиц гарч байсан Тавантолгойн цахилгаан станцыг энэ Засгийн газар, Ц.Даваасүрэн сайд амыг нь барьсан.

Мэргэжлийн хүмүүс ӨБЭХСХАГ-ийн гэрээ буюу Тавантолгойн цахилгаан станцыг барьж байгуулах гэрээг цуцалснаар Рио Тинто-д илт давуу байдал олгосон нь цаанаа нарийн учир шалтгаантай байж болзошгүй гэж буй. Энэ Засгийн газар, Эрчим хүчний сайд Ц.Даваасүрэнгийн хэлж байгаа Оюутолгой өөрсдөө цахилгаан станцаа барих ёстой гэсэн үгс хэдийгээр сайхан эх оронч сонсогдох боловч нарийн учиртаа Тавантолгойн амыг барьж "Рио Тинто"-гийн бөөн баяр болсон. Уг нь монголчууд Тавантолгойдоо өөрсдөө цахилгаан станц барьчихсан бол Оюутолгойд эрчим хүчээ зарсан шиг, илүү гарсныг нь Хятад руу худалдсан шиг, хамгийн гол нь Оюутолгойгоос хараат бус байх байлаа. Одоо Оюутолгойнхон буюу "Рио Тинто" өөрсдөө цахилгаан станцаа барих болсноор магадгүй хэзээ нэгэн цагт Монголын өмнөд бүсэд цахилгааны асуудал дэгдвэл “Рио Тинто”-гоос цахилгаан гуйх гутамшигт байдал гарч болохыг ч үгүйсгэх аргагүй юм.

Үүний зэрэгцээ ТЭЦ-5, Багануурын Цахилгаан станцын ажилд ч тэрээр тээг тавьсаар. Уг нь Монгол Улс эрчим хүчний хувьд хараат бус болчихвол Монголдоо л хэрэгтэй. Гэтэл өөрсдөө барих гэж байсан цахилгаан станцын ажлыг зогсоогоод Рио Тинто-д өөрсдөө барь гээд “бэлэглэх” хэнд ашигтай байх вэ?

Ингээд бодохоор гаднаа эх оронч сонсогдох энэ хүний үг ямар хорлонтой болох нь ойлгогдож байгаа биз.

Төрийн албанд анх ажиллахдаа л “10 хувийн Даваасүрэн” гэж нэршсэн эрхэм сайд одоо юу хийж Монголыг хорлох гэж байгаа юм бол доо. “10 хувийн” гэдэг нэр Сангийн яамны төрийн бичгийн даргаар ажиллаж байхдаа тендерийн төсөв болгоноос 10 хувийг нь авч байх, өнөөгийн 60 тэрбумын хэргийн дэргэд супер санаа анх олж, хэдхэн жилийн дотор 2,5 тэрбум төгрөгний хөрөнгөтэй болсноос үүдсэн нэр. Одоо ч эрчим хүчнийхэн түүнийг “10 хувийн Даваасүрэн” гэж нэрлэдэг юм билээ. Энэ талаар ч олонтой бичигдсэн. /Холбоотой мэдээллийг ЭНД дарж уншина уу/

Тэр 10 хувь ч дүүрч, энэ сайд одоо эрчим хүчний салбараа, цаашилбал Монгол Улсаа хорлохоо болимоор юм даа. Ядахдаа л хоёрын хоёр хүүхэд салбарынх нь хариуцлагагүйгээс амиа алдчихаад байхад уучлал гуйж, эмгэнэл илэрхийлж болдоггүй юм болов уу?

А.Туяа

Холбоотой мэдээллүүдийг дор дарж уншина уу

10 хувийн Ц.Даваасүрэнгийн ардаа нуусан булхайнууд

Ц.Нямдорж:10 хувийн Ц.Даваасүрэн чи дуугүй бай... Орох оронгүй, хэрмэл бадарчин минь...