Токиогийн 2020 оны зуны олимп зохион байгуулах хорооныхон спортын энэ их наадмын шагналын медаль хийхэд зориулан ашиглахаа больсон 50 тонн орчим электрон техник цуглуулсан гэнэ. Энэ төхөөрөмжүүдийг хийхэд ашигласан үнэт металлуудыг нь ялгаж их наадмын медаль хийх юм хэмээн Олимп зохион байгуулах хороо баасан гарагт мэдээлжээ.

“Үйлдвэрлэхдээ үнэт металл оруулсан, хуучирч муудан, ашиглагдахаа больсон, эдэлгээнээс гарсан электрон төхөөрөмжүүдийг цуглуулах ажил ирэх гуравдугаар сарын 31 хүртэл үргэлжилнэ” гэж зохион байгуулагчид тэмдэглээд “Нийгэм, компани, аж ахуйн нэгжүүдийн дэмжлэгээр хангалттай тоног төхөөрөмж цуглараад байгаа” гэсэн байна.

Өнгөрсөн хоёр жилийн хугацаанд улсын хэмжээнд 4000 гаруй цуглуулах цэг байгуулсны ачаар гар утас, дүрс бичлэгийн камер, зөөврийн компьютер гээд 47 тонн гаруй тоног төхөөрөмж цуглуулаад байгаа юм байна.

Зуны олимпийн шагналын бүх медалийг хийхийн тулд нийтдээ долоон тонн орчим үнэт металл хэрэгтэйн дотор хүрэл 2700, мөнгө 3500, алт 28 кг шаардлагатай гэж тооцож байгаа юм.

Зохион байгуулагчид энэ төслөө нэгдүгээрт Японы нийт ард иргэд, нийгмийг зуны олимпийн бэлтгэл ажилд хандуулж оролцуулах, хоёрдугаар байгаль экологийн асуудлыг шийдвэрлэхэд хувь нэмэр болгох зорилготой гэж байна.

Байгальд ээлтэй бамбар

2020 оны Токиогийн зуны олимпийн бамбарыг хийхдээ дахин боловсруулсэн хөнгөн цагаан ашиглахаа зохион байгуулагчид мэдээлжээ. Ийм бүтээгдэхүүнийг 2011 онд Фукусимад болсон газар хөдлөл, цунамид нэрвэгдэгсдэд зориулсан түр сууц барихад ашиглаж үр дүнтэй болохыг нь мэдсэн юм.

Харин одоо олимпийн бамбар хийхэд 10 мянган ялтас металл шаардлагатай болж байгаа гэнэ. Гэхдээ олимпийн галыг өртөөлөн Токиод хүргэхэд яг хэдэн бамбар хэрэгтэйг яг гаргаагүй байгаа юм байна.

Харин бамбарын түлшинд түүхэнд анх удаа устөрөгчийн түлш ашиглана гэж зарлажээ. Токиогийн Үндэсний цэнгэлдэх хүрээлэнд бадамлах олимпийн гол бамбарыг ч ийм түлшээр асаах юм байна. Ийм түлшний гал ямар ч өнгөгүй учраас нэмэлт төхөөргийн тусламжтайгаар ямар ч өнгөтэй болгож болно гэнэ.

Токиогийн олимпийн галыг 2011 оны аймшигт цунамийн ойг дурсан гуравдугаар сарын 11-нд асааж, гуравдугаар сарын 20-нд Японд аваачин олимпийн бамбарын буухиа Фукусимагаас эхлэн Японы нутгаар 121 хоног аялах юм. Үүний 15 хоногт нь нийслэл Токио орчмын дагуул хотуудад аялах бол бусад аймаг бүс нутагт тус бүр хоёр хоног л аялах юм байна.

Японы олимп

Зуны XXXII олимпийн тоглолт Японы нийслэл Токиод 2020 оны долдугаар сарын 9-нөөс наймдугаар сарын 24-ний өдрүүдэд болно. Зохион байгуулагчид энэ наадмын төсвийг хоёр их наяд иен буюу 17,8 тэрбум ам.доллараар төлөвлөөд байгаа юм. Энэ наадмын бас нэг онцлог нь тэмцээн уралдаан болох бүхий л талбай, спортын байгууламж нь тамирчдын байрлах олимпийн хотхноос найман км-ээс холгүй байхаар зохион байгуулж байгаа гэнэ. Энэ нь зохион байгуулагчид, тамирчид, хөгжөөн дэмжигчдийн цагийг хэмнэх, амралт, аялж зугаалах чөлөөт цагийг нь нэмэгдүүлэх зориулалттай гэжээ.

Япончууд энэ удаагийн зуны олимпоор, жолоочгүй такси, солирын бороон гэрлэн шоу, робот орчуулагч, сайн дурын ажилтан гээд олон шинэ зүйлээр бэлэг барихаар бэлтгэж байгаа юм.

ЭХ СУРВАЛЖ:"АРДЧИЛАЛ ТАЙМС" СОНИН. Сэтгүүлч Х.Өлзийбаяр