COP17 энэ удаа зөвхөн “ярьдаг хурал” биш, шийдвэрийг бодит ажил болгох чиглэлд ихээхэн анхаарч байна. Цөлжилттэй тэмцэх тухай НҮБ-ын конвенцын Талуудын 17 дугаар бага хурал /COP17/-ын хоёр дахь өдөр Талууд газрын доройтол, гантай тэмцэх арга хэмжээний хэрэгжилт, санхүүжилт болон шинжлэх ухааны гүйцэтгэх үүргийн талаар хэлэлцэж эхэлнэ.

• Талуудын бага хурлын хэлэлцээ
• Конвенцын хэрэгжилтийг хангах хорооны хэлэлцээ
• Шинжлэх ухааны талуудын хэлэлцээ
• "Үйл ажиллагааг эрчимжүүлэх хамтын ажиллагаа” сэдвийн хүрээнд олон талт дагалдах үйл ажиллагаанууд эхэлнэ.

1. Талуудын бага хурлын хэлэлцээгээр НҮБ-ын конвенцын гишүүн орнууд буюу “Талууд” цөлжилт, газрын доройтол, гангийн эсрэг дэлхий нийтээр баримтлах бодлого, шийдвэрүүдийг хэлэлцэнэ.

2. Конвенцын хэрэгжилтийг хангах хорооны хэлэлцээний хүрээнд, конвенцын шийдвэрүүдийг улс орнууд амьдрал дээр хэрхэн хэрэгжүүлж байгааг дүгнэж, тулгарч буй бэрхшээлийг ярилцана. Тухайлбал, улс орнууд газрын доройтлыг бууруулах чиглэлээр ямар арга хэмжээ авч, ямар үр дүнд хүрсэн зэрэг өргөн хүрээний асуудалд Талууд анхаарлаа хандуулна.

3. Шинжлэх ухаан, технологийн талуудын хэлэлцээ нь цөлжилт газрын доройтол гангийн талаарх шинжлэх ухааны судалгааны үр дүнг бодлого боловсруулагчдад хүргэж, тэдгээр нотолгоонд тулгуурлан бодит шийдвэрт хүрэх үйл ажиллагаа юм.