С.Зоригийн амь насыг хөнөөсөн хэрэгт 24-25 жилийн ял аваад байгаа Б.Содномдаржаа, Т.Чимгээ нарын ар гэрийнхэн Эрдэнэт хотод чимээгүй жагсаал хийж, харин албаныхан хэргийн захиалагчийг нягтлан шалгаж байгаа гэх зуур олон нийтийн эргэлзээ арилахгүй л байна. Ц.Амгаланбаатар нарын хэргээс захиалагчийнх нь хэргийг тусгаарлан шалгаж байгаа гэх даруйд захиалагчийг нь олоогүй байж хэргийг захиалгат гэж яллаж болдог юм уу гэсэн асуулт гарч ирсэн. Тэгвэл энэ талаар:

Улсын Ерөнхий прокурорын газрын Хэвлэл, мэдээлэл, олон нийттэй харилцах ажил хариуцсан хяналтын прокурор Ц.Өлзийжаргал

-Хэргийг бүхэлд нь тал бүрээс нь шалгаад "захиалгаар алсан" гэдэг нь нотлогдсон гэж үзээд шүүхэд шилжүүлсэн. Шүүх "тогтоогджээ" гэж дүгнээд ял шийтгэл оногдуулсан. Харин захиалагч, зохион байгуулагчид холбогдох хэрэгт нэмж  шалгах зүйл байгаа учраас тусгаарлан шалгаж байна гэж news.mn сайтад өгсөн ярилцлагадаа тайлбарласан байна.

Ийн захиалагчийг тусгаарлан шалгаж байгаа гэдгээс үүдэн УИХ-ын гишүүн Ш.Отгонбилэг агсныг захиалагчаар нь зарлах гэж байна гэсэн шуугиан дэгдсэн. Өмнө Б.Содномдаржаа, Т.Чимгээ нарыг Ш.Отгонбилэг агсны тогооч, малчин байсан гэсэн мэдээлэл гараад байсан. Тэгвэл тэднийг гэмт хэргийнхээ ул мөрийг далдлахын тулд дөрвөн хүнийг шатааж амь, насыг нь хөнөөсний нэг нь Ш.Отгонбилэг агсны хамгаалагч байсан гэсэн мэдээлэл гараад байгаа юм.

Энэ галын хэргийн талаар medee.mn сайтын сурвалжлах баг газар дээрээс нь сурвалжилснаар бол одоогоос 11 жилийн өмнө буюу 2006 оны 12 дугаар сарын 21-ны өдөр Орхон аймгийн Баян-Өндөр сумын нутагт гарсан энэ галын хэргийг цахилгааны буруу ашиглалтаас болсон гэсэн дүгнэлт гарсан юм байна. Энэ гэрт Ш.Отгонбилэгийн хамгаалагч байсан гэгдээд байгаа Б.Отгонбаатар эхнэр болон хоёр хүүхдийнхээ хамт галд угаартаж нас барсан аж. Тэр өдөр Б.Отгонбаатарын эхнэрийнх нь төрсөн өдөр байсан бөгөөд талийгаач хүүхдийнхээ хаст дэлгүүрээс хиам талх авчран цахилгаан тогоон дээр халааж идээд шөнө унтраагүй орхисноос гал гарсан гэж тухайн үедээ дүгнэлт гарч байж. Б.Отгонбаатар хэмээх залууг Ш.Отгонбилэгийн хамгаалагч гэж батлах зүйл бас байхгүй. Талийгаач Б.Отгонбаатар нь 1978 онд төрсөн. Айлын бага хүү. 1994 онд Орхон аймгийн III найман жилийн дунд сургуулийг төгссөн, дунд боловсролтой, түүхий эд арьс худалдаж авдаг, жижиг, биетэй томоотой залуу байсан гэж таньдаг хүмүүс нь тодорхойлсон байх юм. С.Зориг амиа алдсан хэрэг 1998 онд гарахад Д.Отгонбаатар 20 настай байсан байж таарах нь. Ш.Отгонбилэг тэр бүр хамгаалагч дагуулж явдаггүй, хамгаалагч нар нь ч харваас андашгүй, булиа, том биетэй залуус байдаг асан гэж мэдэх хүмүүс нь ярьдаг. Ийн ямар ч гэсэн 11 жилийн өмнө ахуйн, буруу хэрэглээнээс үүдсэн гэж тодорхойлогдож байсан галын хэрэг өнөөдөр гэмт хэргээ нуун дарагдуулах гэсэн хэрэг болж тайлбарлагдаж байх шиг байна.

2015 оны наймдугаар сарын 31-ний өдөр С.Зоригийн амь насыг хөнөөсөн хэрэгтэй холбогдуулан Эрдэнэт хотоос Б.Содномдаржаа, Т.Чимгээ нарыг баривчилсан. Үүнээс хоёр сарын дараа уг галын хэргийг дахин сөхөж, шатаж нас барсан иргэн Б.Отгонбаатарын эгч Б.Хишгээг хуулийн байгууллагаас С.Зоригийн амийг хөнөөсөн хэрэгтэй хамаатуулан хохирогчоор дууджээ. Улмаар өнгөрсөн 2016 оны 12-р сарын 27-нд болсон С.Зоригийн амь насыг хөнөөсөн хэргийг хэлэлцэх шүүх хуралд хохирогчоор оролцуулсан гэх мэдээлэл бий. Үнэхээр ч шүүх хурлын тогтоолд хохирогч Б.Хишгээ төлбөр нэхэмжлээгүй гэсэн өгүүлбэр бий.

Хамгийн эргэлзээтэй нь өдгөө Б.Хишгээ болон түүний өмгөөлөгч энэ галын хэргийн талаар юу ч ярьж болохгүй гэж тагнуулын байгууллагынхан анхааруулсан гэж буй. Тэрээр “Бид галыг хүн тавьсан уу, цахилгаанаас гарсан уу гэдгийг мэдэхгүй. Яагаад гэвэл би дэргэд нь байгаагүй юм. Энэ хэргийн талаар хэвлэл мэдээллийн хэрэгсэлд ямар нэг зүйл ярихыг тагнуулын байгууллагаас хориглосон байгаа. Би хэргийн тухай юм хэлэхгүй. Энэ асуудал сөхөгдсөнөөс хойш миний ээж эмнэлэгт хэвтэж сэхээнд орохдоо тулаад байна” гэхээс өөр зүйл хэлэхгүй байгаа аж.

Яг энэ галын хэргийн тухайд Улсын Ерөнхий прокурорын газрын Хэвлэл, мэдээлэл, олон нийттэй харилцах ажил хариуцсан хяналтын прокурор Ц.Өлзийжаргал

-Ц.Амгаланбаатар, Б.Содномдаржаа нарт дээрх гэмт хэргийг нуун далдлах зорилгоор бүлэглэн  2006 оны арванхоёрдугаар сарын 20-ноос 21-нд шилжих шөнө Б.О-г гэртээ амарч байх үед нь галдан шатааж, эхнэр, насанд хүрээгүй хоёр хүүхдийн хамт биеэ хамгаалж чадахгүй байдлыг нь мэдсээр байж, онц харгис хэрцгий аргаар, санаатай шатааж амь насыг нь хөнөөсөн үйлдэлд нь ял сонсгон яллагдагчаар татаж, хэргийг шүүхэд шилжүүлсэн. Шүүх энэ хэргийг нотлогдсон гэж үзэж ял шийтгэл оногдуулсан. С.Зоригийг хөнөөсөн гэх хэргийг илрүүлэхээр Тагнуул, Цагдаагийн ерөнхий газар, Мөрдөн байцаах газар, Прокурор гээд хууль хяналтын байгууллагууд олон жил хүч тавин ажиллалаа.

Үндсэндээ анх хэрэг үйлдэгдсэнээс хойш 18 жил  энэ хэргийг "Улс төрийн  зорилгоор үйлдэгдсэн" гэдэг ойлголтыг  манай улс төрчид ч ярьж, хэвлэл, мэдээллийн байгууллагууд ч бичиж, нийтэлсээр  өнөөдрийг хүрлээ. Хэргийг шалгаж тогтоогоод шийдчихээр "Энэ тийм байх ёсгүй" гээд л  яриад байна. Хүмүүсийн толгойд 18 жил  тогтсон ойлголтыг өөрчлөх хэцүү гэж ярьсан байх юм. Тэгэхээр улс төрийн хэрэг биш ч юм шиг. Яг үнэндээ бол захиалагчид хэнийг сэжиглэн шалгаж байгаа тухайлбал, УИХ-ын гишүүн асан Ш.Отгонбилэгийг холбогдуулан шалгаж байгаа эсэх нь тодорхойгүй хэвээр байна.

А.Ану

Холбоотой мэдээллийг дор дарж уншина уу

Яллагдагчдын ар гэрийнхэн жагсаал хийжээ

С.Оюун:Би тэр процессын нэг хэсэг болохыг хүсээгүй