Мароккогийн “Жинхэнэ ба орчин үеийн нам” (PAM) парламентын сонгуульд хамгийн олон суудал авсны дараа тус намын улстөрч Фатима Захра Эль Мансури тус улсын анхны эмэгтэй ерөнхий сайдаар томилогдлоо. Хаан VI Мохаммед 50 настай Эль Мансуриг ерөнхий сайдаар томилсон байна. Түүнийг тус албан тушаалд нэр дэвших боломжтой байсан Фоузи Лекжаагийн оронд сонгосон байна.

Эль Мансури өмнө нь Марракеш хотын даргаар ажиллаж байсан бөгөөд өмнөх засгийн газарт Хот байгуулалт, орон сууц, хотын бодлогын асуудал эрхэлсэн сайдаар ажиллаж байв.

Тэрбээр 2009 онд Марракеш хотын анхны эмэгтэй дарга болсон юм. Эль Мансури нь Тунисын ерөнхий сайд асан Нажла Будены дараа, Арабын засгийн газрыг тэргүүлсэн хоёр дахь эмэгтэй болж байна.

Марокко нь Үндсэн хуульт хаант засаглалтай бөгөөд улс төрийн эрх мэдлийн ихээхэн хэсэг хааны мэдэлд байдаг. Үндсэн хуулиар парламентын сонгуульд хамгийн олон суудал авсан намын нэр дэвшигчийг хаан засгийн газрын тэргүүнээр томилдог.

"PAM" нам 395 суудалтай парламентад 97 суудал авсан. Улмаар засгийн газраа байгуулахын тулд бусад намтай эвсэх шаардлагатай болж байна. Тус нам өмнөх засгийн газарт хамтран ажиллаж байсан Үндэсний бие даасанчуудын нэгдлийн намтай (RNI) харилцаа муудсан тул шинэ эвслийн бүрэлдэхүүн одоогоор тодорхойгүй байна.

Харин Исламын үзэл баримтлалтай Хөгжил ба шударга ёсны нам (PJD) 54 суудал авч, өмнөх сонгуулийн 13 суудлаасаа мэдэгдэхүйц нэмэгдсэн байна. Гэвч тус нам "PAM"-тай эвсэхээс татгалзаж, сөрөг хүчинд ажиллахаа мэдэгджээ.

ЭХ СУРВАЛЖ: BBC