Санал хураалтын өдөр зарим нэг тойрог, хэсэгт зөрчил гарсаар байна. Тухайлбал, Чингэлтэй дүүргийн 37-р тойрогт  НИТХ-ын сонгуульд МАН-аас нэр дэвшигч Б.Мөнхбатын штаб сонгогчдын саналд нөлөөлөх гэсэн оролдлого хийснийг цагдаагийнхан таслан зогсоосон. Б.Мөнхбатын сонгуулийн штаб Чингэлтэй дүүргийн 2-р хорооны санал авах байртай ойролцоо оршдог бөгөөд өглөөнөөс эхлэн санал өгөх гэж байгаа иргэдийг дуудан штабтаа оруулж, саатуулж байсан байна. Тус штабынхан саналаа өгөхөөр санал хураалтын байр руу орж байгаа иргэдийг дуудаж, штаб руугаа оруулж уулзаж байсан нь мөнгө өгөх гэсэн эсвэл саналд нөлөөлөх гэсэн оролдлого хэмээн ажиглагчид үзэн цагдаагийн байгууллагад дуудлага өгснөөр цагдаагийнхан ирж, штабын байрыг хаалгасан байна.