Ялалтандаа итгэлтэй байсан Ардчилсан нам парламентад ердөө л 9-хөн суудал авснаар намын шинэчлэл хүчтэй яригдаж байна. Намын гишүүдийн хувьд Их хурлаа яаралтай хуралдуулж, алдаа, оноогоо ярилцах ёстой гэсэн шаардлагыг тавьж эхлээд байна. Тэгвэл эн тэргүүнд намын даргын асуудал яригдах ёстой. Сонгуульд ялагдал хүлээсэн намын дарга З.Энхболд ч намынхаа өмнө хариуцлага хүлээхэд бэлэн байгаа гэдгээ илэрхийлсэн. Ингэснээр одоо АН-нд намын болон УИХ дахь бүлгийн дарга хэн болох талаар таамаг дэгдэж эхлээд байна. Энэ удаад намын даргад саях сонгуульд ялалт байгуулсан Лувсанвандангийн Болд хүчтэй яригдаж байна.

Лу. Болд УИХ-д АН-аас сонгогдсон 9 гишүүнээс 1990 оны хувьсгалд оролцсон, гол хүч болсон оюутнуудыг толгойлж явсан, энэ парламентад байгаа ганц "алтан хараацай" нь. Басхүү нийслэлд дэвшсэн 3 хүнээ чирээд, багаараа ялалт байгуулсан цорын ганц хүн.

Парламентад сонгогдоод байгаа С.Эрдэнэ , Д.Эрдэнэбат, Ж.Батзандан  НИТХ-д дэвшсэн багийнхаа гишүүдтэй хамт гарч чадаагүй. НИТХ-д дэвшсэн Цацлатуяа, Батчимэг, Түвшин гуравтайгаа гар нийлж, багаараа ялсан нь Л.Болдыг багийн тоглолт сайтай сайн удирдагч гэдгийг дахин харууллаа. Багийн тоглолт сайтай ийм л хүн өнөөдөр АН-д үгүйлэгдээд байгаа. Түүнээс гадна, парламентад, улстөрд хамгийн их удсан, хамгийн туршлагатай "аксакал" яах аргагүй мөн гэж нам дотроо дүгнэгдэж байгаа.

АН-ын дотоод тэмцэл хурцдаж, бие биеэ барьж идэхдээ тулсан энэ мөчид фракц хоорондын зөрчлийг намжааж, ашиг сонирхлыг нь зөв уялдуулж чадах "төвч", "голч", "уужуу" энэ хүнд намаа шинэчилж, 2020 оны сонгуульд бэлтгэх асар хариуцлагатай түүхэн үүрэг оногдох нь дамжиггүй гэсэн хүлээлт үүсээд байна.

А.АМАР