Ардчилсан намыг шинэчлэх хороог байгуулан ажиллаж байсан Ардчилсан намын хэсэг залуус өнөөдөр сэтгүүлчдэд мэдээлэл хийлээ. Тэд Ардчилсан намын дарга З.Энхболд, ерөнхий нарийн бичгийн даргын үүрэг гүйцэтгэгч Л.Эрхэмбаяр нарыг 24 цагийн дотор багтан намын гишүүд, дэмжигчдээсээ уучлал гуйн огцрох өргөдлөө гаргахыг шаардлаа. Мөн Ардчилсан намын Гүйцэтгэх зөвлөл, Үндэсний зөвлөлдөх хороог 48 цагийн дотор яаралтай хуралдуулж, намын их хурлыг ирэх наймдугаар сарын 15-ны дотор зарлах шаардлага тавьж байгаа аж.  Мөн Гүйцэтгэх зөвлөл, Үндэсний зөвлөлдөх хорооны бүрэлдэхүүнийг 100 хувь шинэчлэх, намын Их хурлаас ил тод нээлттэй, өрсөлдөөний зарчмаар Ардчилсан намын шинэ удирдлагыг сонгох, Ардчилсан намын дүрэмд өөрчлөлт оруулах, намын дүрэмд орсон өөрчлөлтөд нийцүүлэн аймаг, нийслэлийн намын хороодыг шинэчлэн байгуулах зэрэг шаардлага тавьж буй аж.

Үүний дараа АН-ын дарга З.Энхболд сонгуулийн санал хураалтын ноцтой зөрчил үүссэн учраас зохих байгууллагууд шалгах ёстой гэсэн хэвлэлийн  бага хурал хийлээ.

Тэрээр дөрвөн төрлийн зөрчлийг шийдвэрлэсний дараагаар УИХ-ын чуулганыг хуралдуулах ёстой гэлээ

Үүнд:

1.Төрийн албан хаагчдын ажлын байраар наймаалцан, сонгуулийн санхүү 60 тэрбум төгрөгийг бүрдүүлсэн талаарх МАН-ынхны бичлэгийг хуулийн байгууллага шалгаж тодруулах,

2.Хан-Уул дүүргийн 55-р тойрогт гарын үсэг зурсан саналын хуудас авсан иргэдийн тооноос хайрцгаас гарсан саналын хуудас 234-р зөрсөн байна. Энэ асуудлыг сайтар шалгах,

3.Саналын хуудас дууссан бөгөөд дууссан саналын хуудастай аймгууд канондсон саналын хуудсаар санал авсан учраас эдгээр саналын хуудсыг хасаж тооцох ёстой.

4.Хар үгээр царцаа гэж хэлээд байгаа 18 мянган царцааны асуудлыг шийдвэрлэх. 18 мянган сонгогчийг өөрийн биеэр ирээгүй байхад итгэмжлэхээр нэрсийн жагсаалтад бүртгүүлсэн нь хууль зөрчсөн байна.

Зургадугаар сарын 29-нд мэдэгдэл хийх үед дараах зөрчлүүд илрээгүй байсан тул тэрээр сонгуулийн үр дүнг хүлээн зөвшөөрсөн мэдэгдэл хийсэн гэж хэллээ.

Мөн “Анхдугаар чуулган зарлахдаа Ерөнхийлөгч УИХ-ын сонгуульд суудал авсан намуудтай зөвшилцөх ёстой. Зөвшилцөх асуудал хийгдээгүй учир чуулган хуралдах боломжгүй гэж үзэж байна. Төр байгуулахыг бид эсэргүүцээгүй, хууль бусаар төр байгуулагдах явцыг эсэргүүцэж байна” гэлээ.

Мөн тэрээр энэ үеэр УИХ-ын Хууль зүйн байнгын хороо хуралдаж, хууль зөрчсөн энэ асуудлыг хэлэлцэхээр болоод байгаа гэж мэдэгдлээ. Тус байнгын хорооны дарга Д.Ганбат УИХ-ын дараагийн гишүүд тангаргаа өргөөгүй байгаа учраас энэ УИХ буюу Хууль зүйн байнгын хороо чадамжтай байгаа гэж тайлбарласан байна.

Мөн энэ өдрийн бас нэг улстөрийн гэмээр үйл явдал нь ХҮН-аас хэвлэлийн бага хурал хийв. Сонгуулийн өмнө тодорхой хагаралдсанаар нэр дэвшигчдээ бие даагч байдлаар өрсөлдүүлсэн тус намынхан өөрсдийгөө гуравдагч хүчин гэж нэрлээд

-Манай нам Монгол Ардын нам болон Ардчилсан намын араас жагссан. Тухайлбал, 70 дугаар тойрогт нэр дэвшсэн Х.Ганхуяг 24.1 хувь, 57 дугаар тойрогт Т.Доржханд 20.7 хувийн санал авч нийт өрсөлдсөн тойргуудын хүрээнд дунджаар 8.1 хувь буюу 26 мянга гаруй санал авсан гэж ХҮН-ын ерөнхий нарийн бичгийн дарга Д.Гантулга хэллээ.

Мөн тэд Шинээр бүрэлдэх Засгийн газрын хувьд эдийн засгийн хямрал, улс төрийн тогтвортой байдлыг хамтын хүчээр шийдэх зарчмын байр суурьтай байгаа. Бид шүүмжлээд суух биш өөрсдийн зүгээс дэмжлэг үзүүлж, мэргэжлийн боловсон хүчнээ бүрэн дайчилж ажиллах болно гэлээ.

Ийнхүү сонгуулийн дараа харьцангуй тайван байсан улстөрийн амьдрал хөдөлгөөнд орж эхлэв. Бололтой. Өнөөдрийн үйл явдал бүрэн эрх нь дуусч буй Хууль зүйн байнгын хорооны хуралдаанаар үргэлжилж, маргааш анхдугаар чуулган хийх эсэх талаар маргаан өрнөх бололтой. 

А.Ану