Эрх баригчид шүүгчдийн цалинг бууруулахаар омогтой байна. Бүр энэ асуудлыг араандаа зууж, амлаад авчихсан хүн ч харагдана.

Нэг өдөр цалинг бууруулахгүй гэнэ. Маргааш нь бууруулна аа гэнэ. УИХ-аар баталсан хуулиудыг эргэж буцааж шиднэ.

Хуулийн засаглалтай улс оронд байж боломгүй шившгийг энэ богино хугацаанд үйлдэв. Нөгөө хууль засдаг чинь бүүр буцааж шиддэг болоод ирэв.

Ялсан намын ялзмаг ингэж өмхийгөө тавьж эхлэлээ. Хууль шүүхийг хөл толгойгүй самрах дажиндаа ханцуй шамлав.      

Монголын шүүх түүхэндээ олсон том дэвшлийн нэг нь шүүгчийн цалин. Шүүгчдийн цалинг нэмсэн нь шүүгчдэд ямар хэмжээний урам зориг өгснийг шүүгчид ярьдаг юм билээ. Гэтэл тэдний итгэл сэтгэлийг Монголын тамирчин Мандахнаран олимпийн дэвжээнд яллаа хэмээн баярласнаасаа болж медалиа алдсантай адилаар  голыг нь харлатал хасах оролдлого эрчээ авлаа. Сүүлийн 3 жилийн турш эсэргүүцэлтэй тулж байж батлагдсаар ирсэн энэ сэдвийн араас шүүмж тасраагүй. Харин өнөөдөр хууль тогтоогчид асуудалд зорилго тавин ханцуй шамласнаа бат нот болгоод байна. Ц.Нямдорж гишүүн өнгөрсөн баасан гаригийн оройны чуулганы хуралдаан дээр шүүх, шүүгчдийг араандаа зууснаа ахин илэрхийлж, заналт үгээ урсгав.

Уг нь шүүх бидний амин чухал эрхийг хамгаалж, шударга ёсыг баталгаажуулж байдаг. Шүүгчдийг өнгө мөнгөнд авташгүй хүмүүс байлгахын төлөө өндөр цалин олгох ёстойг олон нийт ойлгохгүй байж болно. Гэтэл чухам яагаад Ц.Нямдорж ам ангайх бүртээ шүүгчийн цалинг шүүрэн бахирч, шүүхийн тогоо руу нулимж суудаг юм бол.

 Тийм шударга эх оронч юм бол шүүгчийн аяга руу өнгийж байхаар 60 хүртэл сая төгрөгийн валютаар цалинжаад дээлэндээ багтахгүй яваа төрөөс төрсөн тэрбумтнуудаа хараадаг байгаа даа. Хамгийн удаан төрийн хоолыг хороож ирсэн түүнийг хэдэн муу шүүгчдийн талх л нойргүй хонуулаад хэдэн он улирчээ. Энэ өс зуулт нь одоо бүр хэрээс хэтэрлээ.

Монголын шүүгчид энэ хүний өмнө ямар гэм зэм хийснээ асуучихаж болдоггүй юм байх даа гэж хааяа бодогдмоор.  Шүүхээр шийдүүлсэн хэрэг маргаан байдаг юм болов уу гээд хайхаар Женко Баттулгыг гүтгэсэнд уучлалт гуйх тухай шүүхийн шийдвэр гарсныг л мэдэх юм. Арай тийм өчүүхэн зүйлд бүхэл бүтэн төрийн нэг засаглалд ингэтэл хорсоно гэж санаанд багтамгүй.

Үүнээс өөрөөр шүүгчид түүнийг МСS компаниас байр авчээ, Хятдын тагнуул хийжээ, зуслангийн байрыг нь барьж байсан хоригдол амиа алджээ гэж лав Монгол Улсын нэрийн өмнөөс шийдвэр уншаагүй санагдана.

Шүүхийг мэддэгээрээ олон удаа цээж дэлддэг энэ хүн харин ч зовлон жаргалыг нь мэдээд, мэдэхгүй бусаддаа тайлбарлаж ярьж өгмөөр. Хамгийн эмгэнэлтэй нь МАН хууль мэддэг хуульчгүй нь Зөвлөлтийн школтой хоцрогдсон хуульч Ц.Нямдоржоор тархиа атгуулж байгаа явдал юм. Хорвоо дэлхий социализмын үеийн хууль эрх зүйгээс ангижраад хичнээн удаж байгаа билээ.

Гэхдээ нөгөө талаар шүүхийн эсрэг зарласан эрх баригчдын дажинг өөр талаас харвал гэгээн мэдээ бий. Шүүхэд чиглэсэн аюул занал хэр хүчтэй байна, төдий чинээ Монголын шүүгчид шударга ажиллаж байгаа юм байна гэж ойлгоход хэтрүүлэг болохгүй болов уу. Учир нь шүүхийг өмнөө бөхийлгөх мөнхийн хүслэнт улс төрчидтэй шүүх хэзээ ч дөрөө харшуулдаггүй.