УИХ-ын гишүүн асан Тусгаар тогтнол эв нэгдлийн намын дарга Г.Уянга өнөөдөр "Эрдэнэт үйлдвэр"-ийн хувьчлалын асуудлаар мэдэгдэл гаргаж байгаа тухай мэдээлэл хийлээ.

УИХ-ын гишүүн асан Тусгаар тогтнол эв нэгдлийн намын дарга Г.Уянга​ “Монгол Улсын төсвийн 40 хувийг дангаараа бүрдүүлдэг Эрдэнэт үйлдвэрийг МАНАН бүлэглэл хууль бусаар авч, түүнийгээ Монголд ашигтай ажил хийсэн мэтээр ярьж байгааг Тусгаар Тогтнол эв нэгдлийн нам эрс эсэргүүцэж байна.

Эрдэнэтэд хувьчлал болоогүй, худалдан авалт болсон гэж Ерөнхийлөгч мэдэгдсэн. Ерөнхийлөгч хэлэхдээ “Эрдэнэтийн хувьчлал гэж яриад байна. Гадны улс орон, аж ахуйн нэгжид байсан 49 хувь Монголын аж ахуйн нэгжид ирсэн. Тэгэхээр нэр томьёоны хувьд хувьчлал биш.

Хэрвээ хувьчлал хийхээр бол УИХ-аар хэлэлцүүлэх хуультай гэж мэдэгдсэн. Зөвхөн энэ өгүүлбэрээрээ Ерөнхийлөгч өөрийгөө илчилсэн. Эрдэнэт үйлдвэрийн 49 хувь хувийн өмчид шилжсэн л бол бид хувьчлал гэж ярих эрхтэй.

Хэрэв Монголын болон Оросын талын аль нь ч хувьчлал хийгээгүй зүгээр л худалдан авалт хийсэн байхад яахаараа Эрдэнэтийн 49 хувь ганцхан компанийн хувийн өмч болов гэдгийг Ерөнхийлөгч Ц.Элбэгдорж  олон нийтэд тайлбарлах ёстой. Ерөнхийлөгч хувьчлал биш гэж залилах оролдлого хийсэн ч бодит байдал дээр хувьчлалтай төстэй дээрэм болсон нь тодорхой байна” гэв.

Ч.Болор