АН-ын дарга З.Энхболд Баянгол дүүрэгт нэр дэвшихээр болсон атлаа Өвөрхангайгаас дэвших боломжийг эрэлхийлж байна гэх мэдээлэл саяхан гарсан. Энэ нь ортой байсан аж. Баянгол дүүргээс зугатах болсон шалтгаан нь З.Энхболд  Батын Батбаатараас эмээж, санал хувааж улмаар ялагдчих болов уу гэсэн айдастай байгаа гэнэ.

Сая АН-ын ҮЗХ хуралдахдаа анхан болон дунд шатны намын хорооноос нэр дэвшүүлэн оруулж ирсэн зарим хүмүүсийг хүчээр унагаж, намын дүрэм сонгуулийн хуулийг зөрчин байж фракциудын тохироогоо эн түрүүнд барьсан нь өнөөдрийг хүртэл асуудал үүсгэж байна.

Тухайлбал, Чингэлтэй дүүргийн намын хорооноос 100 хувийн саналаар нэр дэвшихээр гарч ирсэн Б.Батбаатарыг ҮЗХ-ны хурал дээр намын дарга З.Энхболд хүчээр нэр дэвшүүлээгүй. Улмаар Б.Батбаатар намаасаа албан ёсоор гарах өргөдлөө өгч, Иргэний хөдөлгөөний намаас УИХ-ын 70 дугаар тойрог буюу З.Энхболдын дэвшиж байгаа Баянгол дүүрэгт өрсөлдөхөөр СЕХ-нд бичиг баримтаа бүрдүүлэн өгчээ.

Гэвч З.Энхболд СЕХ-нд байнгын дарамт шахалт өгч, энэ хүнийг нэр дэвшүүлж болохгүй, тиймээс нэр дэвших эрхийг нь цуцал. Хэрэв Б.Батбаатарыг дэвшүүлвэл ИХН-ын нийт 28 нэр дэвшигчийг бүгдийг нь дэвшүүлэхгүй болго гэсэн үүргийг СЕХ-нд өгсөн тухай эх сурвалж хэлж байна. СЕХ нь АН-ын дарга З.Энхболдын хууль бус үүрэг даалгавраас болж ажлын хэсгээ байгуулж, хуралдаяаа гээд ч хуралдаж ч чадахгүй, цаг хугацааг тулган хууль бус шийдвэр гарган, Б.Батбаатарын унагахаар хүлээзнэж байна гэх хардлагыг олон нийтэд төрүүлжээ. З.Энхболд СЕХ-г шууд удирддаг уу. Эсвэл СЕХ нь сонгуулийн хуулиа баримталж бие даасан шийдвэрээ гаргаж чадах уу гэдгийг харах л үлдлээ дээ.

Б.ЭНХ