УИХ-ын гишүүн Х.Баттулгын туслахаар ажиллаж байсан Г.Түвшинжаргалыг энэ сарын 16-ны өдөр, мөн Х.Баттулгын туслахаар ажиллаж байсан “Түмэн хишигтэн”-гийн захирал Ш.Эрдэнэтуяаг гуравдугаар сарын 18-ны үүрийн 04.00 цагийн орчимд гэрээс нь баривчилсан талаар мэдээлсэн. 

Энэ өдөр УИХ-ын гишүүн Х.Баттулга хөхүүл хүүхэдтэй эмэгтэйчүүдийг саатуулан баривчлаад байгааг эсэргүүцэн мэдэгдэл хийж байсан билээ. Тэгвэл Ш.Эрдэнэтуяаг баривчилсан өдөр буюу баасан гаригт саатуулж шалгаад, тэр өдрийнхөө буюу гуравдугаар сарын 18-ны орой гэр рүү нь явуулсан байна.

Харин Г.Түвшинжаргалыг хорих эсэхийг шийдэх шүүх хурал Баянзүрх дүүргийн шүүхэд баасан гаригт болж, дахин 14 хоног хорих шийдвэр гаргаад байгаа юм.

Г.Түвшинжаргал нэг ой дөрвөн сартай хөхүүл хүүхэдтэй, хүүхэд нь байнга уйлж байгаа талаар түүний нөхөр Н.Мөнхбаатар ярьж байсан билээ. Тэгвэл өнөөдөр УИХ-ын гишүүн Г.Уянга Г.Түвшинжаргалын нөхөр Н.Мөнхбаатартай уулзаж, ЦЕГ-ын дарга Р.Чингистэй утсаар холбогдон Г.Түвшинжаргалыг суллах, наад зах нь хүүхдийг нь хөхүүлэх талаар арга хэмжээ авахыг хүсчээ. 

УИХ-ын гишүүн Г.Уянга энэ талаар: 

Ганц худагт очиход мээмээ хөхөх гэсэн ой 4 сартай бяцхан хүү аавтайгаа гадаа нь байна. Удирдлагууд нь байсангүй, орлогч дарга Э.Тамир "Хуулиар мөрдөн байцаагчийн зөвшөөрлөөр хоригдогчийг ар гэрийнхэнтэй нь уулзуулах ёстой" гэлээ. УМБГ очиж хэргийг мөрдөн байцааж байгаа хошууч Пүрэвдоржтой уулзаад хүнлэг байж хүүг ээжтэй нь учруулж, мөөмөө хөхөхийг зөвшөөрөхийг гуйлаа. Хошууч "Дээрээ удирдлагатай, тэдэндээ мэдээлнэ" гэж байна. Би, " Та нар хоорондоо ямар бичиг солилцох нь ямар ч хамаагүй, зүгээр л элдэв бичиггүйгээр хүүхэд хоолло" гэж хатуу хэлсэн болно. Хуульзүйн сайдад ЦЕГ-ын дарга н.Чингис "Ээжийг цагдан хорих шаардлагатай, хүүхэд 3 настай" гэж мэдээлжээ. Чингис дарга өнөөдөр мэдээллийг үнэн зөв авсан гэж найдаж байна. Хүү ой 4 сартай, бор хоолонд бүрэн орж амжаагүй, дээр нь ханиадтай, нүднээс нь байнга нулимс гоожиж байна.

Хуульзүйн сайд Д.Дорлигжав, "Ийм хүүхэдтэй эхийг хорих санал оруулсан мөрдөн байцаагч, түүнийг шүүхэд шилжүүлсэн прокурор, хорих шийдвэр гаргасан шүүх бүгд л хариуцлага алдсан байна. Тэдний алдааг засаад өнгөрч боломгүй..." гэлээ. Би сайдтай санал нэг байна!

Намайг бага хүүгээ гаргаад 7 хоноогүй байхад тухайн үеийн Байгаль орчны сайд Л.Гансүхийн хүсэлтээр баривчлан хорихоор цагдаа нар гэрийн хаалгыг эвдэн орж ирж байж билээ. Дараа нь нь хүү минь хэдхэн сартай байхад гэрийн гаднаас микроавтобустай цагдаа нар шүүрэн авч баривчилж байж билээ. Ойтой хүүхдийг эхээс нь салгаж хоолгүй хонуулдаг ннэ чинь тэгээд нөгөө байгуулах гээд 25 жил зүтгэсэн "хүмүүнлиг, иргэний, ардчилсан" нийгэм чинь юм уу?

Бусдыг нь биш юм аа гэхэд ядаж хүнлэг бай! Хүүхдийг бүү хэлмэгдүүл! Энэ адгууслаг шийдвэрийг эх хүний хувьд би эсэргүүцэж байна! Хүүхэд ээжтэйгээ байх ёстой!

Ээжүүд ээ, ой 4хөн сартай бяцхан хүүг мээмээ хөхөх эрх чөлөөг нь олгохын төлөө нэгдэхийг уриалж байна!

УИХ-ын гишүүн Г.Уянгын Н.Мөнхбаатартай уулзсан болон цагдаагийн удирдлагуудтай утсаар ярьж байгаа видеог энд дарж үзнэ үү.