УИХ-ын чуулганаар Нэмэгдсэн өртгийн албан татварын тухай хуульд нэмэлт, өөрчлөлт оруулах тухай, Төсвийн тухай хуульд нэмэлт, өөрчлөлт оруулах тухай, Гаалийн тариф, гаалийн татварын тухай хуульд нэмэлт оруулах тухай хуулийн төслийг хэлэлцэх эсэхийг дэмжив.

Хэлэлцүүлгийн явцад НӨАТ-ын хууль хэн нэгний бизнес болсон гэж УИХ-ын гишүүн О.Баасанхүү шүүмжлэв.

-Шадар сайд Ц.Оюунбаатар: Өмнө нь бэлтгэж байсан НӨАТ-ын тухай хуулийн төслийг та нар өөрчлөөд тэр хуулийн төслөөс хэсэг, хэсгээр нь тасдаж аваад баталсан. Одоо хэрэгжиж байгаа НӨАТ-ын хуультай санал нийлэхгүй зүйл бий.

-УИХ-ын гишүүн Ч.Хүрэлбаатар: НӨАТ-ын хууль энэ оны эхнээс хэрэгжиж эхлээд байна. Энэ хууль бол бүх ААН-д 10 хувийн нэмэлт дарамт учруулсан. Эдийн засгийн хямралын үед татварын дарамт үүсгэхгүй гэж амласан Засгийн газар юу бодож байна вэ? МАН-ын 10 гаруй гишүүн нийлээд НӨАТ-ын хуульд нэмэлт өөрчлөлт оруулах хуулийн төсөл өргөн барьчихсан байхад буцалтгүй тусламжтай холбоотой хэсгийг нь таслаж аваад оруулаад ирлээ. Өнөөдөр Монголын тулгамдсан асуудал бол төрийн алдаатай бодлогоос үүдсэн ААН-үүдийн хямрал юм. Тиймээс НӨАТ-ын тухай хуульд нийтэд нь гар хүрвэл яасан юм бэ?

-УИХ-ын гишүүн Д.Сарангэрэл:Бид өөрсдөө санхүүгийн хүндрэлтэй атлаа гаднаас ирүүлсэн тусламжийн бараанд НӨАТ-ын татварын хаалт тавьж болохгүй гэж байр сууриа илэрхийллээ.

НӨАТ-ын тухай хуулийг энэ оны нэгдүгээр сарын 1-нээс хэрэгжүүлж эхэлсэн бөгөөд гурван сарын дараа хуульд нэмэлт өөрчлөлт оруулахаар хэлэлцэж байна. 

Ингээд хуралдаанд оролцсон дийлэнх гишүүд дэмжсэн тул НӨАТ-ын тухай хуулийн төслийг хоёр дахь хэлэлцүүлэгт бэлтгүүлэхээр Төсвийн байнгын хороонд шилжүүллээ.  

Ч.Болор