Байнга л Ардчилсан намтай санал хуваадаг гэгддэг Иргэний Зориг Ногоон нам энэ удаагийн сонгуульд оролцох боломжгүй болсноор зарим нэг нэр дэвших горьдлоготонгуудын магнай тэнийж байх шиг.

Дотооддоо үл ойлголцож, гурван дарга нь гурван тийшээ харсаар сонгуулийн шансыг алдсан гишүүд нь яах вэ гэдэг асуудал одоо тулгараад буй.

Уг нь гишүүдсээд байх юмгүй түүхэндээ гурван гишүүн “мэндлүүлсэн” нам. Түүний нэг нь УИХ-д тасралтгүй 18 жил “манлайлан” сууж байгаа, мөн л тасралтгүй намын дарга хийж буй С.Оюун.

Нөгөө нь М.Зоригт аль хэдийнэ Ардчилсан нам руу урвачихсан. Одоо бол пэйсбуук, твитерээр алдартай гишүүн. Тухайн үед хоёр гишүүнтэй ИЗНН-ын М.Зоригт “Манай намын гишүүдийн 50 хувь нь ирчихээд байна. Ер нь манай намын УИХ дахь гишүүд 100 хувь санал нэгтэй байгаа” гэж онигоонд орж байсан.

Харин өнгөрсөн 2012 оны сонгуулиар С.Оюунтай ганзага нийлсэн С.Дэмбэрэл. “Худалдаа аж үйлдвэрийн танхимын” гэсэн тодотголтой, “Угаасаа би хоцордгын” гэдэг үгээрээ “од“ болсон С.Дэмбэрэл гишүүнийг хэрхэх бол гэсэн таамаг дэгдэж байсан бол тэрээр Ардчилсан намаас нэр дэвших бололтой. Өөрөө ч үүнийг үгүйсгээгүй. Харин өөр намын өмнөөс нэр дэвшиж болохгүй учраас С.Дэмбэрэл ИЗНН-аас татгалзаж, Ардчилсан намд гишүүнээр элсэх болов уу.

Харин С.Оюуны хувьд УИХ-д нэр дэвшүүлэхгүй гэдгээ илэрхийлчихсэн. Тэрээр залуустаа боломж олгоно гэж хэлж байсан бол өнөөдөр түүнийг НҮБ-д ямар нэгэн албан тушаалд очно гэсэн мэдээлэл гарсан байна. Өмнө нь С.Оюун БОНХАЖ-ийн сайдаар ажиллаж байхдаа НҮБ-ын Байгаль орчны ассамблейн ерөнхийлөгчөөр сонгогдож байсан. Тэгээд ч ах С.Зоригийгоо бусдын гарт амиа алдсанаас хойш 18 жил тасралтгүй сонгогдож байгаа түүнд НҮБ илүү сайн сонголт болж болох юм.

А.АНУ