УИХ-ын сонгуульд нэр дэвшигчдээ эцэслэн тодруулах хугацаа дөхөх тусам намуудын доторхи бужигнаан тэмцэл гаарч байна. Намууд ч юу байх вэ дээ, Монголд ээлжлэн эрх барьж байгаа АН, МАН-ын тулаан сонгуулийн үр дүнг шийднэ гээд хэлчихэд буруутах зүйл байхгүй. Олон нийтэд байгаа ойлгомжтой мэдээллээр бол МАН, эрх баригч АН-ын нэр дэвшигчдийг сониж байж тойргоо зөрүүлэн хуваарилах тактиктай байгаа гэж буй. Гэтэл өрсөлдөгч байх ёстой хоёр намын дарга нар нь хүзүү сээрээрээ хэлхэлдэж, наймаа хэлцэж яваа сурагтай.

Угаасаа энэ удаагийн сонгуулийн хувьд З.Энхболд намын даргын хувьд бүхнийг гартаа атгаж байгаа нь тодорхой. Хэзээнээсээ хойш фракцийнхаа эрх ашгийг л эн тэргүүнд тавьдаг түүний хувьд энэ удаад “Шонхор” фракцийнхаа эрх ашгийг үхэн хатан хамгаалахын зэрэгцээ эсрэг намын даргатайгаа наймаалцаж, зарим тойргийг тохиролцон МАН-ын нэр дэвшигчдэд сул хаяж өгөх наймаа хийж байгаа гэж намынх нь нөхөд хөтөлбөргүй мэдэж авч, зах зухаас нь амсч эхэлж байгаа учраас ихэд бухимдалтай байгаа гэнэ. Энэ нь тэртэй, тэргүй бужигнаантай байгаа АН-ынхны хувьд шинэ дажин ч дэгдээж магадгүй байгаа бөгөөд Зи. Энхболд, Мэ. Энхболд хоёрын наймаа хэрээс хэтэрлээ гэж бухимдаж байгаа сурагтай.

Товчхондоо бол Зи, Мэ-тэй хэрхэн тохиролцохоос АН-ын нэр дэвшигчдийн “хувь заяа” шийдэгдэхээр болоод байгаа бөгөөд өөрийн фракцийнхандаа ашигтай тойрог хуваарилж, зарим фракцийнхнаас тойргийг нь булааж, МАН-ынхантай зөрүүлж тохироо хийж байгаа сурагтай. Энэ “наймаа”-нд хэн нэгэн хохирох нь нэгэнт тодорхой, харин намынхаа “хувь заяа”-г дэнжигнүүлэх вий гэж намынхан нь болгоомжилж байгаа бөгөөд эцсийн мөчид  цаг тулган нэр дэвшигчдээ зарлах нь нэгэнт тодорхой болохоор АН-ын хувьд гадагшаа ил харагдахгүй ч дотроо дэлбэрэхэд ойрхон галт уул шиг бугшиж, бужигналдаж байгаа сурагтай.

А.Ану