Дараагийн Засгийн газарт хотын даргаар ажиллахаа зарлаад буй Э.Бат-Үүлээс ам асууя. Иргэдийн сонгох эрхэд халдан, хотын даргаар үргэлжлүүлэн ажиллахаа зарлаж байгаагийн чинь цаад шалтгааныг иргэд хардаж байна. Хотын даргын зөөлөн сэнтий “амттай” бас “ашигтай” байв уу гэж асууж байна.

Дахин төлөвлөлт нэртэй дайны “гал”-ыг иргэдийн дунд өрдөж, орох оронгүй болсон иргэдээрээ шоу хийж яваа танд ичих нүүр байна уу. Хүүгийнхээ компанийг ямар ч тендергүйгээр дахин төлөвлөлтийн гүйцэтгэгч компаниар шалгаруулан хотын төсвөөс шилжүүлж байгааг чинь иргэн бид юу гэж ойлгох вэ.

Аав нь хотын даргаар ажиллаж байхад хүү нь оффшор бүсэд гурвын гурван компанитай нь /Монгол HD телевизийн мэдээлснээр/ илэрсэн явдал Э.Бат-Үүл таны үед л гарлаа. 

Та ингэж төрийн албыг төрлийнх болгосон атлаа Улаанбаатар хотыг газрын диваажин болгосон мэтээр ярих чинь иргэдээ  басамжлан доромжилсон хэрэг биш үү. Уг нь нийслэл хот нэг л өдөр сүндэрлээгүй. АН хотод анх удаа олонх болсон дөрвөн жилдээ хэний ч хийгээгүйг хийлээ гэж ярихыг чинь сонсоод эгдүүцэж суугаа иргэн олон байна. Харин АН хэзээ ч байгаагүй их хэмжээний төсвөөр “тоглосныг”  ард түмэн дэндүү сайн мэдэж байгааг дуулгъя.

Хотын удирдлагуудын өмнөө барьдаг дахин төлөвлөлт, зам уулзваруудын засвар, автобусны цахим систем, нийтийн тээврийг нэгдүгээр эгнээгээр зорчуулах гэх мэт шийдвэр бүгд өмнөх Засгийн газрын үед тооцоо судалгаа, ТЭЗҮ нь хийгдсэн байсныг ор тас үгүйсгэх чинь ариун явдал уу.  Ингэж улайм цайм олны нүдэн дээр худал ярьсаар байгаад дахин хотод ноёлно гэвэл их санасан газар есөн шөнө хоосон хонодгийн үлгэр болох вий гэж сануулъя. 

“Малыш”  Б.Энхтүвшингийн  цүнхийг барин гүйж явснаа ардчиллыг эхлүүлсэн хэмээн андуурсаар өдий хүрсэн Үүлэн үстэд үнэн гэж байна уу.  Иргэддээ ил, тод нээлттэй ажиллана гэж хэлж гарч ирсэн атлаа хэдхэн сарын дараа хотод өөрийн гэсэн “вант улс” байгуулж, хотын захиргааны байранд хэдэн давхар хаалга бүхий тансаг орчин бүрдүүлэн суудаг байсныг тань ард түмэн мартаагүй байгааг ч давхар сануулъя.

Монгол Улсын баатар Эрдэнийн Бат-Үүл танаас ам асууя. Таны хүүгийн оффшор дансаар нэг байтугай гүлйгээ хийгдсэн байна. Одоо хэлсэндээ хүрч огцорч чадах уу... Дахиад асууя. Та хэлсэндээ хүрч огцорч чадах уу?

М.ГАЛ

Эх сурвалж: WWW.ZALUU.COM