Орон даяар сум, дүүргийн Иргэдийн төлөөлөгчийн хурлыг төлөөлөгчийг сонгох сонгууль болж өндөрлөлөө. Өнөөдрийн байдлаар Сонгуулийн ерөнхий хорооноос албан ёсны мэдээлэл хийхгүй гэсэн бол Нийслэлийн сонгуулийн хорооноос 00.30 цагт хэвлэлийн бага хурал зарласан юм. Ингээд 02.00 цагт Нийслэлийн сонгуулийн хорооноос мэдээлэл хийлээ. 

Нийслэлийн сонгуулийн хорооноос өгсөн мэдээллээр бол нийслэлийн есөн дүүргийн 152 хороонд 295 мандатын төлөө 860452 иргэн санал өгөх ёстойгоос нийт сонгогчдын 48 хувь саналаа өгчээ. Нийт дүнгээр гурван дүүрэгт ирц 50 хувьд хүрсэнгүй. Дүүргийн дундаж ирц ийм боловч нийт ирц хүрээгүй хороо болгонд нэмэлт санал хураалт явуулах юм.

Үүнд нийслэлийн нийт 152 хорооноос 73 хороо ирц хүрсэн, 79 хороо хүрээгүй байна. Нийслэлийн есөн дүүргээс хоёр буюу Багахангай, Налайх дүүрэгт бүх хороод ирц хүрсэн. Тийм учраас бусад дүүргүүдийн хувьд албан ёсоор аль нам ялсныг мэдээлэх боломжгүй, нэмэлт сонгууль явуулснаар нэгтгэсэн дүн гарах ёстой гэв. Харин нийт дүн гарсан Багахангай, Налайх дүүрэгт МАН ялсан байна. Санал авсан дүнг дэлгэцээр харуулсан байдлаас харахад МАН, АН харьцангуй ойролцоо гэхдээ одоогоор МАН давуу санал авсан байдалтай харагдаж байна. Эдгээр нь нийт хорооны 50 хүрэхгүй хувь буюу 73 хорооны дүн юм. 

Ингээд ирц хүрээгүй 79 хороонд хуульд зааснаар долоо хоногийн дотор буюу аравдугаар сарын 23-ны ням гаригт дахин санал хураалт явуулахаар болсон байна.

Дашрамд сануулахад, өнөөдөр саналаа өгсөн хүмүүс дахин санал өгөх шаардлагагүй, зөвхөн саналаа өгөөгүй хүмүүсийн саналыг авах учир нэмэлт санал хураалт гэж тодотгож байгаа юм байна.