С.Зоригийг хөнөөсөн хэргийн шүүх хурал өчигдөр /2016.12.21/ Цагдан хорих 461 дүгээр ангид 10.50 цагт эхэлж 18.00 цаг хүртэл үргэлжилсэн талаар бид мэдээлсэн. Өчигдрийн хурлын хувьд Улсын яллага яллах дүгнэлтийг уншиж сонсгон, шүүгдэгч нараас эхний мэдүүлгийг авсан гэсэн мэдээлэл гарсан билээ. Өнөөдрийн хурлаар яллагдагчдын мэдүүлгийг үргэлжлүүлэн сонсоно.
С.Оюун:Хурлыг нээлттэй явуулах хүсэлтийг маань хүлээж авахгүй байна
Өчигдрийн хувьд өмгөөлөгч шүүгдэгчдийн өмгөөлөгч С.Оюунцэцэгийн даралт ихэсч, бие муудсан тул шүүх хуралдааныг хойшлуулах хүсэлт гаргасан ч шүүх бүрэлдэхүүн хүлээн аваагүй байна. Мөн С.Зориг агсны дүү УИХ-ын гишүүн С.Оюун шүүх хурлыг нээлттэй явуулах хүсэлтээ удаа дараа холбогдох байгууллагуудад гаргасан ч хүлээн аваагүй гэж мэдэгдээд байгаа юм. Тэрээр энэ талаар УИХ-ын гишүүн асан С.Оюун хэлэхдээ “Хэргийг нээлттэй болгох хэрэгтэй. Мөн шүүх хурлыг нээлттэй явуулах хүсэлт гаргаж, шаардлага хүргүүлсэн ч хүлээж авахгүй байгаа” гэжээ. Өмнө нь шүүх хуралд хохирогчоор С.Оюуныг оролцоно гэсэн мэдээлэл гарсан ч одоо байгаа мэдээллээр бол шүүх хуралд оролцоогүй хэвээр байна. Харин долоо хоногийн өмнө хойшлогдсон хурлын дараа яллагдагчдын ар гэрийнхэн шүүх хуралд оролцох хүсэлтээ илэрхийлсээр байгаа ч хариу өгөхгүй байгаа талаар гомдол илэрхийлсний дагуу ар гэрийнхнээс нэг, нэг хүнийг шүүх хуралд оролцуулж буй. Тэд өмнө нь Б.Содномдаржаа, Т.Чимгээ нар хилс хэрэгт гүтгэгдэж байгаа гэж мэдэгдэж байсан.
Г.Энхбаяр:Зурагтаар л С.Зоригийг алагдлаа гэж сонссон хүмүүс шүү дээ, бид
Тэгвэл өнөөдөр шүүгдэгч Б.Содномжаржаагийн эхнэр Б.Энхбаяр нөхрийг нь гүтгэж байгаа талаар хэвлэлийнхэнд ханджээ. Тэрээр:
-Ц.Амгаланбаатар хүн амины хэргээр шоронд ял эдэлж байхаасаа л миний нөхөр лүү байнга мессеж бичиж дарамталдаг байсан. Шоронд эргэж тойрсонгүй гэж өс санадаг байсан юм шиг байгаа юм. Байнга “Чамайг ална, эхнэр хүүхдийг чинь хэн ч биш болгож чадна шүү. Чамайг ямар ч аргаар хамаагүй ийм газар авчирна. Ямар байдгийг нь мэдээрэй” гэхчлэн мөнхийн мессеж бичиж дарамталдаг байсан. Тэр ч хэлсэн үгэндээ хүрэх шиг боллоо. Бид тухай бүрт нь цагдаагийн байгууллагад гомдол гаргаж, мессеж бүрийг нь хэвлээд цагдаад өгдөг байсан. Гэвч цагдаагийнхан шоронд байгаа хүн яав л гэж ерөөсөө тоогоогүй гэж ярьжээ. Ц.Амгаланбаатар нь Б.Содномдаржаагийн хамар хашааны хөрш байсан аж. Мөн Г.Энхбаяр
-Өнгөрсөн оны наймдугаар сарын 31-нд хүмүүс "Нөхрийг чинь машинтай баахан хүмүүс аваад явчихлаа" гэж хэлсэн. Тэгээд цагдаагийн байгууллага дээр очсон боловч олоогүй. Тав дахь өдөр нь хотод цагдан хорих төвд саатуулагдаж байгааг нь олж мэдсэн гэж ярьжээ.
Яг энэ өдөр тагнуулынхан гэрт нь болон хадам аавынд нь нэгжлэг хийжээ. Үүнээс өмнө тэдний гадаа байнга хар машин зогсох болсон. Энэ үед шоронд байсан Ц.Амгаланбаатар утсаар залгаж “Чи ОО орж байна уу, одоо л ажлаасаа ирж байгаа юм уу, юундаа хөшигний цаанаас гөлөлзөөд байгаа юм" гэх мэт хийсэн үйлдэл бүрийг нь нэг бүрчлэн хэлдэг байсан гэнэ.
-Б.Содномдаржааг хэрэг хийснийг хөдлөшгүй баримтаар тогтоосон гээд байгаа шүү дээ?
-Хутга мутга гэж юу байхав дээ. Өөрөө ч гэсэн энэ хэрэгт гүтгүүлж байна. Их гомдолтой байгаагаа хэлсэн.
-Ер нь хэрэг гардаг шөнө яг хаана байсан юм бол. Та мэдэх үү?
-Аав ээжтэйгээ хадлан дээр байсан. Тэгээд орой нь ирээд ээж будаатай цай хийгээд бид хэд телевизороо үзэж байтал мэдээгээр С.Зориг бусдын гарт амиа алдлаа гэх мэдээ гарч байсан шүү дээ. Тийм байтал л нөхрийг минь тэр хүнийг алсан гээд байх юм гэж ярьсан байна.
Үүнээс гадна хэргийн газраас олдсон үсний ДНК-гийн шинжилгээ яллагдагчдынхтай таарч байгаа гэсэн мэдээлэл гарсан. Гэвч зохих байгууллагаас үүнийг үгүйсгэсэн, нотолсон ямар нэгэн хариулт өгөөгүй байна. Хуралд гэрчээр Г.Чулуунбат, н.Давааням гэх хоёр хүн мөн онцгой байдлын хоёр шинжээч оролцож байгаа юм байна.
Шүүх хурлыг Ерөнхий шүүгч М.Алдар даргалж, шүүгчээр Б.Мөнх-Эрдэнэ, С.Оюунчимэг, өмгөөлөгчөөр Л.Мөнхтөр, С.Оюунцэцэг, Д.Дашдорж, Л.Энхсайхан, улсын яллагчаар Б.Батжаргал, Ж.Сандагсүрэн нар оролцож байгаа юм.
Хурал өнөөдөр мөн 18.00 цаг хүртэл үргэлжлэх бололтой.
А.Ану
Нэмэлт мэдээлэл:15:00 цаг. Шүүх хуралдаан шүүгдэгчдийн мэдүүлгээр эхэлж, завсарлагагүй үргэлжилж байна. Яллагдагчид дөрвөн цаг гаруй мэдүүлгээ өгсний улсын яллагч, хохирогч, сэжигтний өмгөөлөгчид шүүгдэгчдэд асуулт тавьж, хариулт авч байна.
Холбоотой мэдээллийг дор дарж үзнэ үү
С.Зоригийн үхэлтэй холбоотой хүн амины 10 хэрэг
Сэтгэгдэл байхгүй байна