Буддын шашинтай монголчуудын хувьд тухайн жилийн засал, номоо Цагаан сарын шинийн 15-ны дотор багтаан хийлгэвэл зохистой гэсэн заншил байдаг. Тийм ч учраас цагаан сарын өдрүүдэд шашны сүм хийдүүд хөл ихтэй байдаг билээ. Хэрвээ та засад гүрмээ хийлгэж амжаагүй байгаа бол ямар ном засал хийлгэх зохилтой талаарх мэдээллийг хүргэж байна.

Бичин жил гарч буй энэ үед могой, гахай жилтнүүд тусгай засал, харин бар жилтнүүд онцгой засал хийлгэх хэрэгтэй юм байна. Харин жил орсон хүмүүс оршуулга хурим найрын үйлийг цээрлэж, зайлшгүй үед цээр гаргах ёстой. Мөн жилийн турш хэрүүл тэмцлээс зайлсхийж, аливаа буянд даган баясваас сайн хэмээн зурхайд буужээ.

Ингээд жил нь орж буй хүмүүс ямар засал ном хийлгэх мэдээллийг хүргэе.

Жил орогсод

13 болон 73-ны жил нь бич жилтэй “Хүү” махбодьтой жил тул биеийн махбодь хямрах гэмтэй тул Найман гэгээн, Лхамын ганшаг хуруулж, балин өргө.

25, 85-ны жил нь бич жилтэй  “Нөхөр” махбодьтой жил тул жаргал, зовлон ээлжлэн ад зэтгэр босох тул Догсүн, Доржнамжом, Цэнд, Доржнамжомын жавтуй үйлдвэл сайн.

37, 97-ны жил нь бич жилтэй “Дайсан” махбодьтой жил тул өвдөх хийгээд гарлага гарч болзошгүй тул Юм жайвран, Дүйсүм, Цэвэгмэдийн чого хуруулж, Лусад балин өргө.

49-ний жил нь бичин жилийн махбодийн “Эх” жил тул хийморь доройтох гэмтэй Нити, Жинсрэг айлтга.

61-ний жил нь өөрийн төрсөн жилтэй адил махбодьтой жил тул шулмын хөнөөл гарч болзошгүй. Ширнэн уншуул. Сац талби, Цэдүв насан бүтээл үйлдвээс сайн.

Жил орсон хүмүүс оршуулга, хурим найрын үйлийг цээрлэж, зайлшгүй үед цээр гарга. Эр хүний жил угтаж ордог тул урьдаас засч сэрэмжил. Эм хүний жил үдэж дагадаг тул жил орсны дараа ч засал хийлгэ.

Нийт бич жилтнүүд жилийн турш хэрүүл тэмцлээс зайлсхийж, аливаа буянд даган баясваас сайн.

Заслын ном өөр өөр тохиолдолд давхцан гарч байвал заавал тэр бүр дахин давтан уншуулах шаардлагагүй. Нэг л удаа уншуулахад болдог байна.

Ямар засал хийлгэх вэ?

Их харш жил:

Бар жилтнүүд дүнсүр буюу /Өнцөг долоо/ их харш жилтэй учирна. Хулгай дайсан зохисгүй юм болж болзошгүй. Иймд Жамбалцанжод, Дашзэвэг, Найман гэгээн айлдуул. Замд явбал Далха тахиул.

Шишид жил:

Гахай, могой жилтнүүд шишид буюу дайсан жил буух тул Гурван гүрэм, Сундуй, Шишиджойтав айлдуул.

Түнсүм:

Хулгана, луу жилтнүүд түнсүмийн засалтай тул Жадамба, Жанаггадог, Гурван гүрэм айлдуул.

Суудал өнцөгдсөн:

Үхэр, туулай, могой, хонь, тахиа, гахай жилтнүүд суудлын өнцгийн засал хийлгэ.

33 насны мөчлөг засал:

1984 оны модон хулгана жилтнүүд 33 насны мөчлөг засалтай тул Улаан юм, Цэгмэдийн чого, Гурван гүрэм айлдуул.

Голлосон мэнгэний үр:

2016 оны гал бич жил нь 2 хар мэнгэтэй тул 1917, 1926, 1935, 1944, 1953, 1961, 1971, 1980, 1989, 1998, 2007 онд төрсөн хүмүүсийн мэнгэ голлож байгаа тул мэнгэний тарни унш. Мэнгэ голлосон жил тухайн хүний сэтгэл хямрах, элдэв бэрхшээл тохиолдох шалтгаан олон байдаг тул мэнгэний бурхнаа сайтар шүтэж, зүрхэн тарни уншин бие, хэл, сэтгэл гурваа хянамгайлж явбал сөрөг зүйлд өртөхгүй. Голлосон мэнгэний засалд Жанаги гаг дог, Найман гэгээн, Доржнамжом, Базарсад уншуул.