“Эс Эм Контейнер Байг” ХХК байгуулагдаад 10 гаруй жил болж буй. Тус компанийн хүнд даацын уутны үйлдвэр уул уурхайн болон ахуйн хэрэглээний бүх төрлийн шуудай үйлдвэрлэдэг. Жилд 240 мянган ширхэг даацын уут үйлдвэрлэх хүчин чадалтай, 120 гаруй ажилтантай, нэхмэл оёдлын иж бүрэн үйлдвэр ажээ.

Үйлдвэрийн хүчин чадал 1000 орчим хүн ажиллуулж, 700-гаас нэг сая 300 мянган төгрөгийн цалин олгох боломжтой.

Хаягдал гардаггүй, байгальд ээлтэй үйлдвэр, үйлдвэрлэлд хэрэглэсэн усыг дахин эргүүлэн ашигладаг. 2005 оноос 3.0-3,5 тн-ын даацтай зэсийн баяжмалын уут үйлдвэрлэж, Уулын баяжуулах “Эрдэнэт” үйлдвэрт нийлүүлсээр иржээ. 2013 онд техник технологийн шинэчлэл хийснээр Оюу толгой компанид нийлүүлдэг болсон.

Чингис бондоос авсан 800 сая төгрөгийн зээл үйлдвэрийн хүчин чадлаа өргөтгөхөд том дэмжлэг болсон гэж үзжээ.

Тус үйлдвэр жилд 240 мянган ширхэг даацын уут үйлдвэрлэх хүчин чадалтай ч 30 гаруй мянгыг л борлуулдаг байна. Засгийн газрын хувьцаа эзэмшдэг компаниудад энэ төрлийн бүтээгдэхүүнийг нийлүүлэх хүсэлтэй байгаа аж.

Чанарын шаардлага хангасан бүтээгдэхүүн үйлдвэрлэдэг ийм үйлдвэрүүд Монголд байгаа тохиолдолд үндэсний үйлдвэр, үндэсний бүтээгдэхүүнээ худалдан авахад санал санаачилгатай ажиллах, “Эрдэнэт” зэрэг үйлдвэрийн захиалгад даацын уутыг дотоодын үйлдвэрээс авах ажлыг зохион байгуулах, захиалгад хамруулах хэрэгтэй гэж үзэж байна.

Манай үндэсний үйлдвэрүүд чанартай сайн бүтээгдэхүүн үйлдвэрлэж чадаж байна. Одоо бараа бүтээгдэхүүнийг нь борлуулах, эргэлтэд оруулж хэрэгцээт газар нь хүргэхэд Аж үйлдвэрийн яам бодлогын түвшинд зохицуулалт хийх хэрэгтэй болжээ. Хууль эрх зүйн хүрээнд дэмжлэг үзүүлэх ямар боломж байна, зах зээлийн үндсэн зарчмыг хадгалсан ямар зохицуулалт хийж болох тал дээр ойрын хугацаанд бодлого гаргаж ажиллах шаардлагатайг ч мөн Ерөнхий сайд хэллээ. Ийм тохиолдолд үйлдвэрүүд чанартай, сайн бүтээгдэхүүн үйлдвэрлэж, үнэ ханшийн хувьд уян хатан байх ёстой гэдгийг тэрээр мөн хэллээ.

Ирэх долоо хоногийн “Шийдлийн цаг”-аар Худалдан авах ажиллагааны газарт ажиллана. Тус газар зөвхөн худалдан авах үйл ажиллагааг зохион байгуулахаас гадна дотоодын үйлдвэрүүд ямар бүтээгдэхүүн санал болгож байна, бүтээгдэхүүний зах зээлийн үнэ ханш ямар байгааг цахим хэлбэрээр хэрэглэгчдэд хүргэдэг үйлчилгээг давхар үзүүлэх учиртай гэж Ерөнхий сайд Ч.Сайханбилэг “Шийдлийн цаг”-аар хэллээ.