Улс төр, нийгмийн нэрт зүтгэлтэн С.Зориг агсны эхнэр Б.Булганыг урьдчилан саатуулах төвд хориод таван сар болж байна.

Түүнийг мөөгөнцөртэй хүйтэн өрөөнд, 24 цагийн турш хурц гэрэлтэй нөхцөлд байлган салхинд ч гаргадаггүй, ар гэрийнхэнтэй нь уулзуулахгүй байгаа талаар мэдээлэл гарч, ар гэрийнхэн ч УИХ-ын Хүний эрхийн дэд хороонд өргөдөл гаргасан.

Түүний ээж охиныхоо биеийн байдалд маш их санаа зовж байгаагаа хэвлэлээр хэлж байсан билээ. Өмгөөлөгчийнх нь зүгээс ч хүнд нөхцөлд  бие муудаж байгаа тул эмнэлгийн тусламж авах шаардлагатай гэсэн хүсэлтийг удаа дараа гаргаж байсан.

Харин өчигдөр хүндэрсэн тул гурав дахь шатлалын эмнэлэгт үзүүлж, оношлуулах шаардлагатай талаар өмгөөлөгчийн хүсэлтийг прокурор хүлээн авсан.

Улсын ерөнхий прокурорын газраас энэхүү өргөдлийг хүлээн авч Б.Булганыг цагдан хорих 461 дүгээр анги руу шилжүүлсэн хэмээн эх сурвалж мэдээллээ.  Б.Булган хамгийн хүнд нөхцөлтэй гэгдэг Төв аймгийн урьдчилан саатуулах төвд хоригдож байсан юм. Харин одоо Б.Булганыг эмнэлэгт хэвтүүлэн эмчлүүлэх боломж гарч магадгүй гэж ар гэрийнхэн найдаж байгаа аж.

Өчигдөрхөн Монголын ардчиллын удирдагч Б.Зориг агсны төрсөн өдрөөр журмын нөхөд нь хөшөөнд нь уламжлал ёсоор цэцэг өргөсөн. Тэднийг 18 дахь удаагаа ийн цэцэг өргөхөд гэргий нь шоронгийн хүйтэн өрөөнд хоригдож байв. Гэхдээ одоо ч гэсэн нөхцөл байдал дээрдсэн эсэх талаар нарийн, тодорхой мэдээлэл үгүй хэвээр байна.

А.Ану