Сонгууль болох дөхсөн болоод ч тэр үү улстөр, нийгэмд үймээн шуугиан ар араасаа гарч байна. Улстөрчдийн ард иргэдийн анхаарлыг татах гэсэн үйлдэл нэг л амжилттай болж өгөхгүй байгаа бололтой. Харин иргэдийн дунд үүсээд байгаа 1072 хувьцааны асуудал хурцаар хөндөгдөж байна.

Иргэд мэдээлэлгүйгээсээ болж ийн урт цагааны гудамжинд хонон өнжин хувьцааг нь худалдан авах Өвөрмонгол хүмүүсийг хүлээж суугаа гэнэ. Гэвч энэхүү хувьцааг худалдах боломжгүй гэдгийг албаныхан хэлсэн.

Өнөөдөр ч гэсэн энэ тухай “Ил тод уул уурхай”-н хэвлэлийн бага хурлын үеэр дурьдаад өнгөрсөн. Энэ үеэр Монголын үнэт цаасны арилжаа эрхлэгчдийн холбоон Б.Өлзийбаяр “Үнэт цаасны зах зээл дээр мэргэжлийн үйл ажиллагаа явуулдаг холбооны хувьд бидний зүгээс холбогдох тайлбаруудыг тавьж байгаа.

1072 ширхэг хувьцаа өнөөдрийн байдлаар арилжиж эхлээгүй байгаа. Монголын хөрөнгийн бирж, санхүүгийн зохицуулах хороонд бүртгэлгүй байгаа. Мөн Засгийн газрын тогтоолоор хувьцааг захиран зарцуулах эрхгүй.

Ард иргэдийн дунд ташаа мэдээлэл тарсан байгаа бөгөөд иргэдэд хандаж хэлэхэд хууль эрх зүйн хүрээнд хувьцааг худалдаалах ямар ч боломж байхгүй. Харин энэ хувьцаа хэзээ арилжаанд орох вэ? гэдэг асуудлыг цэвэр компани өөрөө шийднэ. Тухайн компани өөрийн бизнесийн үйл ажиллагаандаа дүгнэлт хийгээд, дэлхийн зах зээлийн үнэ ямар байгааг төлөв байдлыг харгалзан үзэждүн шинжилгээ хийж байж Эрдэнэ таван толгойн шийдэх асуудал юм” гэв.

 Тэгвэл энэ тухай иргэд сонсохыг ч хүсэхгүй байгаа мэт улайран дайрч байна. Энэ мэдээлэл худал бөгөөд хувьцааг худалдах, худалдан авах боломжгүй гэж олонтаа хэлсэн ч тэд “Нийгэм, эдийн засгийн байдал сайнгүй байхад хувьцаагаа хятадуудад ч хамаагүй худалдана. Бид олон хонож байна энд бидэнтэй зогсож байсан хүн хувьцаагаа зараад явчихсан. Тиймээс худалдан авч байгаа нь үнэн. Эндээс хувьцаагаа худалдсаныхаа дараа л явна” хэмээн бухимдалтайгаар ярьж байлаа.

Ийн ташаа мэдээллээс улбаатай хөл хөдөлгөөн ихэссэн урт цагааны гудамж хэдий болтол ийм байдалтай байхыг мэдэх аргагүй юм. Цагдаагийнхан тэнд цугласан иргэдийг тарахыг шаардаж байгаа ч тэдний үгийг сонсож байгаа хүн нэг ч байхгүй буюу 1072 хувьцаагаа худалдан хэмээн улайрцгааж байна.

Ч.Гэрэл