Нийслэлийн Засаг даргын Тамгын газраас хэвлэлийн хурал зарлаж, олон нийтийн дунд эргэлзээ төрүүлсэн асуудлуудад албан ёсоор хариулт өглөө. Хэвлэлийн бага хуралд НЗДТГ-ын Хэвлэл мэдээлэл, олон нийттэй харилцах хэлтсийн дарга Э.Дагиймаа, Улаанбаатар хотын Захирагчийн ажлын албаны "Хүнс худалдаа үйлчилгээний хэлтэс"-ийн дарга О.Нарантуяа болон бусад албаны хүмүүс оролцлоо.

Улаанбаатар хотын Захирагчийн ажлын албаны "Хүнс худалдаа үйлчилгээний хэлтэс"-ийн дарга О.Нарантуяа баар, ресторан , шөнийн цэнгээний газруудын цагийн хуваарийн талаар мэдээлсэн юм. Тэрбээр хэлэхдээ:

-Баар, шөнийн цэнгээний газруудыг 00.00 цагаас хаана гэсэн ташаа мэдээлэл сүүлийн үед хэвлэл мэдээллийн хэрэгслээр нийтлэгдэх  боллоо. Шөнийн цэнгээний газрын цагийн хуваарьт өөрчлөлт ороогүй.  2015 оны долоодугаар сарын 9-ний өдөр баталсан хуваарь өнөөг хүртэл үйлчилж байна. Хуваарьт дурдсаны дагуу зарим баар ресторан  шөнийн 04.00 цаг хүртэл  үйлчилгээгээ үргэлжлүүлж байгаа. Одоогоор 00.00 цагаас хаана гэсэн захирамж гараагүй" гэлээ.