Монголын Хэвлэл мэдээллийн зөвлөлөөс Дэлхийн хэвлэл мэдээллийн ёс зүйн өдрийг Монголд анх удаа тэмдэглэж байна. Энэ өдрийн хүрээнд өнөөдөр /2016.09.30/ "Ес зүйтэй сэтгүүл зүйн төлөө" уулзалт танилцуулгыг зохион  байгууллаа. Уулзалтад телевиз, вэб сайт болон сонин, сэтгүүлийн сэтгүүлчид хүрэлцэн ирсэн юм. Мөн УИХ-ын гишүүн М.Оюунчимэг ирж өөрийн үзэл бодлоо хэллээ.

УИХ-ын гишүүн М.Оюунчимэг “Сэтгүүл зүйн ёс зүйн долоо хоног Монгол Улсад анх удаагаа болж байна. 1998 онд батлагдсан хэвлэлийн эрх чөлөөний тухай хууль нь Монгол Улсын Үндсэн хуулийн 10.6-р зүйлийн 16-д Монгол улсын иргэн үзэл бодлоо чаөлөөтэй илэрхийлэх, үг хэлэх, хэвлэн нийтлэх эрхийг баталж өгсөн хууль юм.

Энэ хуулинд хэвлэл мэдээллийн байгууллагууд мэдээллээ нягтлах, нийтэлж нэвтрүүлж байгаа зүйлдээ хариуцлага хүлээх заалт байдаг.

Гэтэл энэ хуулиас хойш Монголын нийгэм хурдацтай өөрчлөгдөж байна. Энэ хурдацыг хэвлэл мэдээллийн салбар гүйцэх тал дээр дутмаг байгаа юм.

Угтаа бол хэвлэл мэдээллийн салбар түрүүлж чиглүүлж байх ёстой. Гэтэл санхүү болон боловсон хүчний хувьд ч, стандартын хувьд ч нийгмийн хөгжлийн хурдацтай хөл нийлүүлэх зайлшгүй шаардлага гарч ирж байна. Тиймээс нийгэмтэйгээ хэвлэл мэдээлийн байгууллага яаж зохицож харьцах ёстой, харилцаа нь юу байх ёстой, мэргэжлийн сэтгүүлчдийн ёс зүй, хариуцлага гэж юу байх, хэвлэл мэдээлийн байгууллага сэтгүүлчийн нийгмийн баталгаа, ашиг сонирхлыг хэрхэн хамгаалах вэ гэдэг энэ бүгдийг хуулиар зохицуулах зайлшгүй шаардлага бий болж байгаа юм.

Үүнийг хангах үүднээс хэвлэл мэдээлийн эрх чөлөөний тухай хуулийг шинэчлэн найруулж, өөрчлөлт оруулж дээрх хэлсэн хэвлэл мэдээлийн байгууллага бусад гарсан хууль тогтоомжтой хэрхэн харилцах, сэтгүүлчдийн үйл ажиллагаа, эрх, ашиг сонирхолыг хэрхэн хамгаалах, сэтгүүлчийн ёс зүйн хариуцлагыг яаж ногдуулах ёстойг хуульчилж өгсөн цагт хэвлэл мэдээлийн салбар үнэ цэнэтэй, чадвартай, нийгмийн манлайлагч, чиглүүлэгч байх үүргээ бүрэн гүйцэтгэх чадвартай болно.

Би өөрөө хэвлэл мэдээллийн салбараас төрсөн УИХ-ын гишүүн хүний хувьд хэвлэл мэдээллийн эрх чөлөөний тухай хуулийг шинэчлэн найруулж батлуулах ажилд идэвхтэйгээр оролцох болно гэдгээ хэлмээр байна.

Мөн хэвлэл мэдээллийн үндсэн хуулинд хүн бүхэн хэвлэн нийтлэх эрх чөлөөтэй байна гэж зааж өгснөөс болоод хэн дуртай нь телевиз радио нээж, хэн дуртай нь сонин сэтгүүл, сайт ажлуулдаг болсон нь мэргэжлийн гэдэг юм байхгүй болчихоод байгаа юм. Угтаа бол хэвлэлийн салбар нь хамгийн өндөр зарчимтай, нягт хянамгай ажиллагаатай, чанга стандартай салбар юм.

Тэгэхээр энэ салбарыг хадгалж, манлайлж явуулахын тулд зайлшгүй хэвлэлийн мэдээллийн эрх чөлөөний тухай хуулинд өөрчлөлт оруулах шаардлагатай. Тэгсэн цагт улс төрчид, бизнесменүүд дайсан, өрсөлдөгчөө намнахын тулд эсхүл улс төрч хүн олон нийтэд танилцахын тулд хэвлэлийн салбарыг ашиглах энэ мэт буруу зуршлуудыг бид халах хэрэгтэй” гэв.

Ч.Гэрэл