Зарим албан тушаалтны цалингийн хэмжээг тогтоох тухай УИХ-ын тогтоолын төслийг Засгийн газраас өнгөрсөн сарын 9-ний өдөр өргөн мэдүүлсэн билээ.

Уг тогтоолын төслөөр УИХ дахь нам, эвслийн бүлгийн ажлын албанынхан, сум, дүүргийн ИТХ-ын дарга, шүүхийн шинжилгээний байгууллагын шинжээч, мэргэжилтнүүдийн үндсэн цалинг нэмэгдүүлж байгаа юм байна. Ингэхдээ нам, эвслийн бүлгийн ажлын албаны дарга УИХ-ын Тамгын газрын Нарийн бичгийн даргатай ижил, бүлгийн ажлын албаны зөвлөх болон ахлах референтүүд УИХ-ын Тамгын газрын зөвлөх, ахлах референттэй ижил цалинтай байхаар тогтоолын төсөлд тусгажээ.

Мөн бүлгийн ажлын албаны референтүүд УИХ-ын Тамгын газрын референттэй адил цалинтай болно.

Харин сум, дүүргийн ИТХ-ын дарга сум, дүүргийн Засаг даргатай, шүүхийн шинжилгээний байгууллагын шинжээч, мэргэжилтэн цагдаагийн байгууллагын оффицер ахлагчтай ижил хэмжээний үндсэн цалин авдаг болох юм байна.

Энэхүү тогтоолын төслийг өнөөдрийн УИХ-ын чуулганы нэгдсэн хуралдаанаар хэлэлцэн батлах юм байна.

Ташрамд дурдахад, одоогоор УИХ-д зөвхөн МАН-ын бүлэг бий. АН-ынхны тухайд зарим гишүүн нь намын гишүүнчлэлээс татгалзсан тул бүлэггүй болж “УИХ дахь Зөвлөл” гэдэг статустай болсон билээ.

ЭХ СУРВАЛЖ:24BARIMT.MN