• Эхлэл
  • “Залуучуудын үнэн” сонин, “Залуу үе” сэтгүүл шинээр мэндэллээ

“Залуучуудын үнэн” сонин, “Залуу үе” сэтгүүл шинээр мэндэллээ

2021/01/18

Өнөөдөр нэгдүгээр сарын 18-Монголын хувьсгалт залуучуудын эвлэлийн суурин дээр Монголын залуучуудын холбоо шинээр эмхлэгдэн байгуулагдсан өдөр. Монголын залуучуудын төв байгууллага МЗХ ирэх наймдугаар сард 100 жилийнхээ ойг тэмдэглэнэ. Харин МЗХ шинээр зохион байгуулагдсан энэ өдөр тус холбоо “Залуучуудын үнэн” сонин, “Залуу үе” сэтгүүлээ шинэчлэн гаргаж, уншигчдынхаа гарт өргөн барилаа.

“Залуу үе” сэтгүүл анх “Манай үе” нэртэйгээр 1923 онд, “Залуучуудын үнэн” сонин 1924 онд хэвлэгдэн гарсан. МЗХ 2016 оноос түр тасалдаад байсан сонин, сэтгүүлээ шинэчлэн гаргаж байгаа юм байна. Мөн холбооныхөө дэргэд IZALUU.MN сайтыг ажиллуулж эхлээд байгаа бөгөөд сонин, сэтгүүлээ  Улаанбаатар хот болон 21 аймгийн нийт 1200 гаруй салбар, үүрүүдээрээ мөн түгээх юм байна.

Мөн МЗХ шинэчлэн зохион байгуулагдсан энэ өдөр тус холбооны Ерөнхийлөгч О.Гэрэлт-Од холбооны үе, үеийн ажилтан, удирдлагууд, гишүүд дэмжигчид болон Монголын нийт залуучууддаа хандан мэндчилгээ дэвшүүллээ. Мөн энэ өдөр тус холбооны нийслэл болон орон нутгийн салбар, хорооны төлөөллийг хүлээн авч уулзлаа.

98 жилийн түүхтэй “Залуу үе” сэтгүүл, 97 жилийн түүхтэй “Залуучуудын үнэн” сонины нэмэлт захиалга орон даяар явагдаж байна.      


Сэтгэгдэл байхгүй байна

Сонин хачин