Авлигатай тэмцэх газар хурандаа нарын хэргийг шалгаж эхэлсэн бололтой. Хэдхэн хоногийн өмнө буюу хоёрдугаар сарын сарын 18-ны өдөр АТГ-ынхан Батлан хамгаалах яамны Аж үйлдвэрийн нэгдлийн дарга болон санхүүгийн албаны өрөөг лацадсан байна. Тус яамны нэр бүхий албан тушаалтан яамнаас байгуулсан гэрээний төлбөрөөс хувь нэхсэн гэх гомдол АТГ-т ирсэн. Энэ нь зөвхөн ганц хүнтэй хамаарах хэрэг биш, Батлан хамгаалахын яамад авлига, гэрээний хувь хүртэгч гэсэн "хэрэг"-үүд уламжлал шахуу болсон учраас энэ хэргээс үүдэн олон хэргийн илэрч магадгүй гэгдэж байна.  Шалгагдаж байгаа гэх хурандаа гэрээ хийсэн гадаадын төлөөлөгчдөөс мөнгө нэхэхдээ Батлан хамгаалахын сайд Д.Бат-Эрдэнийн нэрийг барьсан гэж буй. Хэдийгээр нэрийг барьсан гэж буй ч энэ хэрэгт салбарын сайд ч хамааралтай байж болзошгүй.

Энэхүү хэргийн талаар Батлан хамгаалах яамны эх сурвалж  “Албан тушаалд шинээр томилогдоод удаагүй байгаа хурандаа К-г авлигын асуудлаар шалгаж эхэлсэн тухай яригдаж байна. Өнгөрсөн долоо хоногт яамтай байгуулсан гэрээг шинэчлэхээр ирсэн гадны төлөөлөгчдөөс үндэслэлгүйгээр мөнгө нэхэмжилсэн гэсэн. Ингэхдээ гэрээний үнийн дүнгийн 10 хувийг Өмнөд Солонгос дахь нэр бүхий дансанд шилжүүлэхийг шаардаж, хүссэн мөнгийг нь өгөөгүй тохиолдолд гэрээнд гарын үсэг зурахгүй гэсний улмаас хурандаагийн албан өрөөнд шалгалт оруулсан юм билээ” гэж тайлбарласан гэж medee.mn сайт мэдээлсэн байна. 

Мөн АТГ-аас энэ хэргийн талаар албан ёсны ямар нэгэн мэдээлэл, тайлбар хийгээгүй байна.