Монголбанкнаас өнөөдөр /2017.02.24/ сэтгүүлчдэд мэдээлэл хийлээ. Монгол банк төв банкуудын олон улсын жишгийн дагуу сар бүр санхүүгийн нөхцөл байдлын талаар мэдээлэл хийх уламжлал тогтоогоод байгаа бөгөөд тус мэдээллийн цагаар Монголбанкны хэвлэлийн төлөөлөгч болон газрын захирал холбогдох албаны хүмүүс цаг үеийн мэдээллийг танилцуулж, сэтгүүлчдийн асуултад хариултад хариулдаг юм.

Энэ удаагийн хэвлэлийн хурлаар анхаарал татсан асуудлуудын нэг нь Ипотекийн санхүүжилтийн асуудал байлаа. Төв банкны зүгээс Ипотекийн зээл цаашид ч үргэлжилнэ гэж мэдэгдлээ. Үүнд:

Монголбанкны Мөнгөний бодлогын газрын захирал Б.Баярдаваа “Сүүлийн үед ипотекийн зээл зогссон, Монголбанк санхүүжилт олгохгүй байна” гэдэг ташаа мэдээлэл цацагдаж байна. Ипотекийн зээл зогсоогүй. Сүүлийн хоёр сарын хугацаанд 800 орчим иргэний ипотекийн зээлийн хүсэлт арилжааны банкаар дамжин шийдэгдсэн байна. Санхүүжилт нь Монголбанкинд байршиж байгаа ипотекийн зээлээр баталгаажсан бондоос эргэн төлөгдөж байгаа эх үүсвэрээр санхүүжигдэж байна. Тухайн бондын үндсэн төлбөр болон хүүний төлбөр энэхүү санхүүжилтэд ашиглагдаж байгаа. Олон улсын валютын сантай хэлэлцээ хийх шатанд ипотекийн зээлийг үргэлжлүүлэх шаардлага байна гэдэг асуудлыг ярилцаад үргэлжлүүлэх шийдвэрт хүрсэн” гэлээ.

Энэ оны төвшинд ипотекийн зээлийн санхүүжилтийг 300 орчим тэрбум төгрөг байхаар тогтжээ.