Ерөнхий сайд Ж.Эрдэнэбатыг огцруулснаас хойш /2017.09.07/ УИХ-ын ээлжит бус чуулганыг зарлан хуралдуулах шаардах бичгийг Монгол Улсын Ерөнхийлөгч Х.Баттулга, УИХ-ын даргад илгээсэн. Энэхүү бичгийн хариуд ээлжит бус чуулган хуралдуулах шаардлагагүй гэсэн хариу өгсөн билээ.

Уламжлал ёсоор УИХ-ын дэгийн тухай хуульд зааснаар намрын чуулганыг жил бүрийн аравдугаар сарын 1-нд нээдэг. Харин энэ жил намрын чуулганы нээлтийг аравдугаар сарын 2-нд хийхээр болжээ. Учир нь аравдугаар сарын 1 ням гариг таарч байгаа юм. 

Намрын чуулганаар хэлэлцэх асуудлын хамгийн эхэнд Монгол Улсын 30 дахь Ерөнхий сайдыг томилох, Засгийн газрын бүтэц, бүрэлдэхүүнийг батлах асуудал багтжээ. Ерөнхий сайдаа огцруулсан МАН-ын Бага хурал есдүгээр сарын 25-нд болж, Ерөнхий сайдын нэрээ тодруулан УИХ-ын ээлжит чуулганд танилцуулснаар хуулиар заасан 45 хоногийн хугацаанд Ерөнхий сайдаа томилж амжина гэж үзэж байгаа бололтой.  

УИХ-ын ээлжит намрын чуулганаар мөн Монгол Улсын 2017 оны төсвийн тодотголыг хэлэлцэх, Монгол Улсын 2018 оны төсвийн тухай хууль, Төрөөс 2018 онд баримтлах Мөнгөний бодлого зэрэг томоохон хуулиудыг хэлэлцэнэ.