Бөхийн төрлүүдийн 2021 оны залуучуудын ДАШТ даваа гаригт ОХУ-ын Уфа хотод эхэлсэн. Өчигдөр эмэгтэйчүүдийн 50, 55, 59, 68, 76 кг-ын жингийн урьдчилсан болон хагас шигшээ барилдаан боллоо.

50 кг-ын жинд зодоглосон өсвөр үеийн Азийн АШТ-ий мөнгө, хүрэл медальт, “Буэнос-Айрес-2018” залуучуудын олимпын наадамд оролцож байсан, спортын мастер Б.Энхзул хагас шигшээд Туркийн Зехра Демирханыг 9:4-өөр ялснаар өнөөдөр алтан медалийн төлөө барилдахаар болсон. Тэрээр алтан медалийн төлөө АНУ-ын тамирчин Эмили Кинг Шилсонтой хүч үзнэ.

Түүнчлэн 76 кг жинд зодоглосон Ө.Одбаг хагас шигшээд Энэтхэгийн Бипашаг 9-4 харьцаагаар ялснаар хүрэл медалийн төлөө Казахстаны Дилназ Мулкиноватай барилдахаар болсон.

Мөн 55 кг-д 2018 оны өсвөр үеийн ДАШТ-ий хүрэл медальт Мөнхбатын Мөнхгэрэл 1/8 шигшээд Кыргызстаны Калмира Билибек Кызыд 4:6-гаар ялагдсан ч өнөөдөр дагаж барилдахаар болов.

Тэрээр дагах барилдаанд АНУ-ын тамирчин Пейтон Жейн Струдтай барилдах бөгөөд ялбал хүрэл медалийн төлөө ОХУ-ын Анастасиа Иандушкинатай барилдана.

Эх сурвалж: Монголын чөлөөт бөхийн холбоо