Хотын удирдлагуудын хооронд албан тушаал хүлээн авч, ажилдаа орох үеэс л томилгооноос үүдэлтэй хагарал зөрчил бий болсон. Өдгөө энэ байдал нь хашаанаасаа хальж гарах хэмжээнд хүртлээ томорсон бололтой.
НИТХ-ын даргаар томилогдсон Ц.Сандуй нийслэлийн МАН-ын даргын хувиар нам нь ялалт байгуулсны дараа Нийслэлийн Засаг даргаар томилогдох ёстой байв. Гэвч сонгуулийн өмнө Ц.Сандуй нийслэлийн намын даргын хувиар албан тушаал наймаалж, 60 тэрбум төгрөгийн санхүүжилт босгох төлөвлөгөө ярьсан бичлэг нь задарч шившиг болсон. Зөвхөн түүнийг шившиглээд зогсохгүй намынхаа нэрийг шороонд хутгаж хаясан. Хуулийн хариуцлагад ч татаж болохоор тэрхүү баримтыг эвлүүлэг, гүтгэлэг гэж хэлээд хэн ч итгэхээргүй зүйл байсныг бүгд мэднэ. Өөрийнх нь дуу хоолой, яаж ч тасалж эвлүүлсэн байлаа гээд өөрөөр ойлгох боломжгүй 60 тэрбум төгрөгийн асуудал.
Жаран тэрбум төгрөгийн асуудлаар МАН шаварт унах төдийгүй намагт шигдэж ч болох нөхцөл байдал үүсээд байсан нь үнэн. Чухам үүнээс болоод Ц.Сандуй Нийслэлийн даргаар томилогдож чадалгүй ард хоцорсон нь үнэндээ ёс суртахууны хариуцлага хүлээсэн хэрэг. Намаа яллагдах нөхцөлд оруулчихаад намын хорооны даргын хувиар Засаг дарга болно гэж хэлэх эрх түүнд байгаагүй шиг албан тушаалын томилгоо түүний тойроход мөн л хэлэх үггүй сууж байсан биз.
Тийм ч учраас хоёр шатны сонгуульд ялж, төрийн эрх мэдлийг шилжүүлэн авсан МАН-ын удирдлага Нийслэлийн Засаг даргаар Су.Батболдыг томилох шийдвэрийг гаргасан. Энэ бүх улс төрийн нөхцөл байдал, намын шийдвэр, томилгоог өнөө хэр нь Ц.Сандуй хүлээн зөвшөөрч чадахгүй, үүнийгээ ил ярьж зүрхлэхгүй яваа нь үнэн бололтой.
НИТХ-ын зүгээс Засаг даргад үзүүлэх ёстой дэмжлэгүүд гэхээр зүйл өнгөрсөн хугацаанд харагдсангүй. Харин ч Засаг дарга С.Батболдын үг, үйлдэл, шийдвэр, тушаалаас өө сэв, өөнтөг отож, тийм зүйл олдвол сошиал сүлжээ болон хэвлэлээр ил гаргах байдлаар “үл үзэгдэх” гар хөлөө ажиллуулсаар ирэв.
Нийслэлийн МАН-ын хорооноос дэвшүүлж, сонгуулийн үеэр Ц.Сандуйгийн сурталчилсан “Аз жаргалтай хот” мөрийн хөтөлбөр нь сонгуулийн дараа НИТХ-аас албан ёсоор батлагдаад байгаа. Харин Засаг дарга С.Батболдын хувьд Нийслэлийн эрх зүйн байдлын тухай хуулийг шинэчлэхээр төслийг нь санаачлан боловсруулж, Засгийн газарт өргөн барьсан. Уг хуулийн үзэл баримтлалд С.Батболдын концепци гэж хэлж болох ч хотыг хөгжүүлэх ерөнхий зураглал, аль ч намд өмчлөгдөхгүй том төлөвлөгөө тусгагдсан нь сайтад байршуулсан төслөөс нь харагдаж буй. Засаг даргын хэрэгжүүлэх үйл ажиллагааны тойм төсөл энэ.
Харин Ц.Сандуйгийн “Аз жаргалтай хот” аль хэдийнэ олны танил болж, нийслэлийн МАН-ын хорооныхон үүгээрээ пиар хийж, нэг бус арга хэмжээг зохион байгуулж амжжээ. Хамгийн сүүлийн жишээ нь Төрийн бус байгууллагын нэрээр зохион байгуулж, зодооноор дууссан “Аз жаргалтай хот” хэмээх цэнгүүн юм.
Ц.Сандуйгийн иймэрхүү пиар нь хэмжээнээсээ хэтийдэж, харин энэ тоолонд буулт нь Засаг дарга С.Батболд дээр ирж байна. Үүнийг нь Ц.Сандуйгийн чиглүүлж буй пиарын баг улам бүр өдөөх, олон нийтийн сүлжээгээр түгээх ажлыг зохион байгуулж байгааг намынхан нь сайн мэдэж байгаа. Харин хотын удирдлагуудын хагарлыг сайн мэдэхгүй олон нийтэд бол ондоо сэтгэгдэл төрж байна.
Хашаанаасаа хальж гарсан энэ хагарал Сандуй, Сундуйгийн хоорондын өгөө, аваа байхаа болиод нийслэлийн эрх мэдлийг авсан МАН-д хор хохирол учруулах хэмжээнд хүрснийг хэн хэн нь анзаарах хэрэгтэй болжээ. Намынхаа нэр хүндийг боддоггүй юм гэхэд тэдэнд саналаа өгсөн хотын иргэд, сонгогчдын итгэлийг яах вэ гэдгийг бодолцох ёс суртахуунтай баймаар юм даа.
Сэтгэгдэл байхгүй байна
tegeed ch ard irgediigee khuvaaltsaj taltsuulj baikh khereg yu bnaa
mur muruuruu urdkh ajilaa khiigeed l yavyaaa