Ганц модны боомтоор дамжуулан БНХАУ-д нийлүүлсэн нүүрсний хэмжээ 12 дугаар сарын 16-ны байдлаар 12.7 сая тонн болсон талаар Өвөр Монголын өөртөө засах орны Баяннуур хошуунаас мэдээллээ.

Энэ нь жилийн өмнөхөөс 104.56 хувиар нэмэгдсэн дүн болж байна. Үүнээс өмнө 2012 онд жилийн үзүүлэлт нь 12.09 сая тонн болж, 12 сая тонноос давж гарч байжээ.

БНХАУ-ын худалдааны орчин сайжирсан болон дотоодын зах зээлийн эрэлт нэмэгдсэн зэрэг нь ийнхүү Монголын нүүрсний нийлүүлэлтэд нөлөөлсөн гэж БНХАУ-ын талын албаны эх сурвалж тайлбарласан байна. БНХАУ-ын Засгийн газар дотоодын нүүрсний уурхайнуудынхаа гарцыг багасгах бодлого баримталснаас үүдэж тус улсын ган үйлдвэрлэгчид түүхий эдээ хилийн чанадаас худалдан авах нь нэмэгдсэн аж.

Харин 2016 оны хамгийн өндөр үзүүлэлтээр Монголоос нийлүүлсэн түүхий коксжих нүүрсний ханш тонн тутамдаа 950 юань, угаасан нүүрснийх тонн тутамдаа 1200 юань болсон талаар БНХАУ-ын талын эх сурвалж мөн онцоллоо.

Эргэн сануулахад, 12 дугаар сарын нэгнээс эхлэн БНХАУ-ын тал Ганц модны боомтын хураамжийг нэмснээр нүүрсний уурхайн амны үнэ 0.9 ам.доллараар буурна гэсэн тооцооллыг “Эрдэнэс Тавантолгой” компани танилцуулсан юм.

Эх сурвалж: Uurhai.mn