Цаг уур, орчны шинжилгээний газрын урьдчилсан мэдээллээс харахад ирэх ням гариг буюу нэгдүгээр сарын 22-ноос ихэнх нутгаар хүйтний эрч сулрах төлөвтэй байна.

Нэгдүгээр сарын 21-нд зүүн аймгуудын нутгийн зүүн хэсгээр цас орж, цасан шуурга шуурч, салхи секундэд 12-14 метр хүрч ширүүсэх ч маргаашнаас нь нутгийн баруун хэсгээр, цаашдаа ихэнх нутгаар дулаарах төлөв ажиглагджээ.

Нэгдүгээр сарын 22-25-ны өдрүүдэд Увс нуур болон Дархадын хотгор, Завхан голын эх, Идэр, Тэс, Ерөө голын хөндийгөөр 33-38 хэм, өдөртөө 21-26 градус, Хөвсгөл, Хэнтэйн уулархаг нутаг, Хүрэн бэлчир, Орхон-Сэлэнгэ, Хараа,  Туул, Тэрэлж, Хэрлэн, Онон, Улз, Халх голын хөндийгөөр шөнөдөө 25-30 хэм, өдөртөө 14-19 хэм байх аж.

Их нууруудын хотгор, Монгол Алтайн нурууны өвөр хэсэг, Хангайн уулархаг нутгаар шөнөдөө 21-26 хэм, өдөртөө 11-16 градус хүйтэн байна.

Харин ирэх өдрүүдэд говийн бүс нутгийн баруун хэсгээр шөнөдөө 10-15, өдөртөө 0-5 хэм, бусад нутгаар шөнөдөө 14-19, өдөртөө 7-12 хэм хүйтэн байх ажээ.