Казакстан улсаас ядруурлыг бууруулах зорилготой Монголд орж ирсэн “Жи Тайм” корпорацийн Монгол дахь албан ёсны салбарын ерөнхий захирал Ж.Маратыг энэ сарын 12-нд “Чингис хаан” Олон улсын нисэх онгоцны буудлаас хил гарах гэж байхад нь Эрүүгийн цагдаагийнхан баривчилжээ.

Учир нь Ж.Марат нь Монгол Улсад олон улсын пирамид хэлбэрээр олон мянган хүнийг элсүүлж мөнгө угаах аргаар дансандаа зургаан тэрбум төгрөг хуримтлуулсан гэсэн үндэслэлээр эрүүгийн хэрэг үүсгэн шалгаж эхэлжээ.

Түүнд болон түүний эхнэрт хилийн хориг тавьсан байсан ч бөгөөд ийнхүү хилээр зугтах гэж байгаад саатуулагдсан байна. Мөн зарим эх сурвалж эхнэрт нь хилийн хориг тавьсан байсан боловч хилээр гарч зугатсан гэж мэдээлж байгаа юм. Одоогийн байдлаар тэдний дансанд дахь зургаан тэрбум төгрөгийг битүүмжлээд байгаа бөгөөд эцсийн байдлаар хэдэн хүн хохирсон болон хэдэн төгрөгний мөнгө угаасныг тогтоохоор мөрдөн байцаалтын ажилллагаа үргэлжилж байна.

Одоогоор энэхүү хэрэгт найман хүнийг саатуулан шалгаж байгаа гэсэн мэдээлэл байгаа юм.

Казакстанаас гаралтай гэх энэхүү сүлжээний талаар Казакстаны Ерөнхийлөгчийн шууд ивээл доор байгуулагдсан, Монгол Улсын Ерөнхий сайд дэмжиж байгаа гэх мэтчилэн худал мэдээлэл цацаж, гишүүддээ машин бэлэглэж байгаа, гишүүд нь их хэмжээний мөнгө авсан гэх мэт зургууд сошиалаар хүчтэй тархаж байсан.

Монгол Улсын холбогдох албаныхны зүгээс албан ёсоор сэрэмжлүүлэг гаргаж байсан боловч олон иргэд мөнгөө өгч хохирсон байх магадлалтай байна.

Мөн сошиалаар энэхүү сүлжээг идэвхтэй сурталчилж, мөнгө авч байсан иргэдээс сэрэмжилнэ үү гэсэн ийм пост тархаж байна. Дашрамд сануулахад энэхүү сүлжээнд мөнгөө өгч хохирсон хүмүүс зохих байгууллагад хандаарай.