Засгийн газрын өчигдрийн /2016.09.28/ хуралдаанаар 8 хувийн ипотекийн зээлийг 100 ам.метр талбайтай орон сууцанд олгохоор болсон тухайгаа мэдээлсэн. Харин үүний өмнө Монголбанк 100 ам.метр талбай бүхий орон сууцанд зээл олгохгүй гэдгээ мэдэгдэж байсан юм.

Тэгвэл өнөөдөр Монгол банк 100 ам.метр хүртэл талбайд зээл олгохыг дэмжиж байгаагаа албан ёсоор мэдэгдсэн байна. Бид энэ талаар өмнө эсрэг байр суурь илэрхийлж байсан Монголбанк ямар шийдвэр гаргах бол гэсэн хүлээлт үүсч байгаа талаар мэдээлсэн билээ. /Холбоотой мэдээллийг энд-Монгол банк VS Засгийн газар дарж уншина уу/

Ингээд УИХ-ын Тамгын газрын Хэвлэл мэдээлэл, олон нийттэй харилцах хэлтсээс гаргасан албан ёсны мэдээллийг хүргэж байна.

Монгол Улсын Их Хурлын дарга Миеэгомбын Энхболдод өнөөдөр /2016.09.29/ Монголбанкны Ерөнхийлөгч Н.Баяртсайхан “Төрөөс мөнгөний бодлогын талаар 2017 онд баримтлах бодлого батлах тухай” УИХ-ын тогтоолын төслийг өргөн мэдүүлсэн юм. Энэ үеэр тэрбээр ипотекийн зээлтэй холбоотой асуудлаар мэдээлэл хийв. Монголбанкны Ерөнхийлөгч Н.Баяртсайхан, “Ипотекийн зээлийн хөтөлбөрийг анх Монголбанк санаачилж, Засгийн газарт шилжүүлсэн. Шинэ Засгийн газар байгуулагдаад эргээд Монголбанкинд шилжүүлж байх шиг байна. Ипотекийн зээлийн хөтөлбөрийг Монголбанк цаашид үргэлжлүүлнэ гэсэн байр суурьтай байна” хэмээн мэдэгдэв.

Ипотекийн зээлийн хөтөлбөрт тав болон найман хувийн хүүтэй хоёр төрлийн зээл байгаа бөгөөд таван хувийн хүүтэй зээлийг улс орны эдийн засгийн нөхцөл байдал, зах зээлийн зарчмыг үндэслэн зогсоохоор болсон байна. Тодруулбал, Монголбанкнаас мөнгөний бодлогын хүүг 15 хувиар тогтоосон. Тус банкнаас гарч буй зээлийн хүү 2 хувь, үүн дээр арилжааны банкууд 3 хувийн хүүг нэмж 5 хувийн хүүтэй зээлийг орон сууц худалдан авч буй иргэдэд олгож байсан. Гэтэл бодлогын хүүгээ 15 хувь болгосон атал арилжааны банкууд ийм бага хүүтэй зээл гаргах нь зах зээлийн зарчимтай нийцэхгүй байгаа учраас ийнхүү зогсоох шийдвэр гаргасан байна.

Өнөөдрийн байдлаар таван хувийн хүүтэй ипотекийн зээлэнд хамрагдахаар хүсэлт, өргөдлөө гаргасан нийт 4000 гаруй иргэнд 90 орчим тэрбум төгрөг зарцуулахаар байгаа аж.

Харин найман хувийн хүүтэй ипотекийн зээлийг Засгийн газартай хамтран цаашид үргэлжлүүлнэ гэдгээ Монголбанкны Ерөнхийлөгч Т.Баяртсайхан мэдэгдлээ. Уг зээлийн хөтөлбөрийг 100 хүртэлх ам.метр талбайтай орон сууц худалдан авах иргэдэд үргэлжлүүлэн олгож, 100 ам.метрээс дээш талбайтай орон сууцыг зах зээлийн зарчмаар арилжааны банкны зээлийн хүүгээр худалдан авах нь зүйтэй гэсэн байр суурьтай байгаагаа илэрхийлсэн юм гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Ийнхүү өмнөх Засгийн газрын бага орлоготой болон гэр хорооллын барилгажуулах төсөл, утааг бууруулах бүс газруудад баригдсан орон сууцанд олгож байсан 5 хувийн зээлийг шинэ Засгийн газар, Монголбанкны шинэ удирдлага зогсоож, 100 ам.метр хүртэл буюу одоо зах зээлд борлогдохгүй байгаа, тансаг зэрэглэлийн орон сууцны зээлэнд олгохоор боллоо.

А.АНУ